May ni 6, 2016 7.25pm
Hlim ni kawla a en chhungin,
Hringnun zinkawng lam tluang ka chhui,
Hmatiang lenrual khum tum rengin,
Ka pan an sawi phai ram khawpui.
Chung tur nipui a hrâng lua e,
Zotlang ram nuam ka ngai mang e,
Thlang kawrvai lenna ram hian,
Zo thlifim leng ko ve maw?
Lei nun bi chhir kim tum a,
Lenrual hnunga kawl êk thaiin,
Sâppui lung fing te hmaah,
Tawnhriat thutin hlan vel ka tum.
Silh leh fen leh thuam tin reng,
Uluk tak leh fai tâwk taka,
Ka buatsaih hnu dim lo takin,
Tual cho-uiin a pet der der.
Thinlai a nâ hril thiam a har,
Huat thu chhiain kawngro su lo,
Hmelma ral lian cho-ui hnehin,
Kolkata-ah ka kal kat kat!
No comments:
Post a Comment