HMANGAIHNA MITTUI

Chul tur pawha vul ngai lo he hringnun hi, nang ka tawn ni che khan khuanu’n a vawrtawp a pek tluk zeta nasain a hlim a, chu aia sang zawk chuan van kawtthlerah pawh hlim zai an vawr bik kher lo ang a, khawvela pa nuamsa leh hlim ber pawhin min phak lo hial ta ve ang! Van angel zinga khawsa mai awma mawi khan ka hmangaihna, insit tak chunga i tawna ka hlan kha i lo dawngsawng a, chu hmangaihna tlawm tak chu awmzia i lo neihtir hlauh a nih kha.

Tinkim ka han dawn thin a,
Thinlaiah a thar leh thin;
Nangnen suihlungruala lenlai
Nghilh thei hian ka mawi nem maw?

Hlimni kan chhiar a, fanau maltluan chawiin hun leh ni kan hmang a, khuanu min pek hmangaihna chu kan chen a, damlai pialral kan chen thin a nih kha. Nang leh ka fate chu ka khawvel in ni a, chu khawvel duhawm tak min petu leh malsawmna tinrenga min vurtu Pathian fakin a rawng kan bawl thin a nih kha.

Mahse, eng rilru chhiain nge mawlh che a, ka hriat loh laiin eng thil teh rengin nge nuai che ka hre lo. Ka hmangaih che tluk zeta min hmangaih ve emaw ka tih laiin thawk leh khatah kei leh ka fate lak ata i kal bo ta si. A ngaihna kan va hre lo pafa em!

Aw khawiah nge min hnemtu kha?
Ka zawng thin che a, lenrual zingah.

I tan tih theih ka nei tam lo pawh a ni mai thei, ka hmangaihna i tan ka hlan a, ka neih zawng zawng pawh i hlimnan chauh. Mahse, tunah chuan chu chuan i tan awmzia a nei tawh lo va, kei leh i fate hian ngaiin kan au lawm lawm che a, i lo kir leh hun kan nghak mek a nih hi. Ka hmangaihna che hian tawp ni a nei ngai dawn lo va, he lei taksa hi piallei thuahriat hnuaia zalh a nih hunah meuh pawh chu hmangaihna chu tuma’n an chhilh bo thei ngai lovang.

Hmangaihna mittui leh pangpar,
I tan rimtuiah ka hlan che kha;
Tunah a thlawn mai an chang leh si,
Tuar thiam a har aw a na!
Hrilh ka hai ngei e,
Lunglam ka vai.

I kal bo ni atang khan nun hian awmzia a nei hleithei tawh lo va, ka taksa peng mai ni lo he ka rilru leh ngaihtuahna zawng zawng hi a kim thei tawh lo va, a khingbai tlat tawh asin. I tel lo chuan in chhunga awm pawh a nuam lo va, thiante zinga hmun dang daiha hun hman pawh a nuam hek lo. Mi hlimnaah kan lungngai a, an lawmna chu kan tan natna a ni zo ta! He hnuchhawn hringnun, amah chauhva khawsa tura rianga taka kalsan hi an hrethiam ve mawlh si lo.

Lenrual te chu chhailai di nen,
Hlimte’n an leng an nui hiau ve;
Min dawnpui lo ka chan khua ruat,
Sulhnu chhuiin ka vai leh si.

Kan tawn tirh che khan ka hmangaihna chu a so bulh bulh a, a phul nasa lutuk a i hnen a thleng ta hial kha a ni a, zah pawh sawi lovin a vawi khatna atan ka rawn rim che a, thingpui tui tak min lo lum kha ka la hre reng. A sat lutuk avangin ka tibaw then hial a nih kha. Kha ta tang khan kan pahnih hringnun chu phatsantu awm lovin a kal rual dial a nih kha.

Zah pawh dawn zo lovin kumtluanga runhmun len dunpuia’n ka sawm che a, i inngaihtuah chhung hun tawi te pawh rei ka tihzia kha! Ka sawmna tlawm tak mittui nena min chhan ni khan kan va’n hlim dun tak em tiraw? Thihna chauh lo chuan min then suh se tiin zawlpuan min silhpui tak kha. Tunah lem tawn tur i awm tawh si lo. Dam reng chung siin i thi a, beiseina nen ka nghak che a, beiseibo beisei beidawnthlakzia ka hre fiah tulh tulh thung.

Khartung sawnin in run sangah,
Lawi leh ka nuam i kiangah ngei;
Kan zalna laikhum thlehnem hi,
Mahte’n ka chul zan tlai nemah.