DI HLUI

Soo-ah,

Vawiin, September thla tawp dawn tawh lamah hian, favang a ințan chho dawn tawh emaw tih laiin fur ruah hnukhawi a la sûr cheu a.

Ka class bang chu ruahin min dan avangin ka khawtlai hle a ni tih erawh min hriatpui kher lo ang. A... chu tah chuan beiseina țawngkam a la tel fo mai ka ti! Eng nge ka tih țhin a, khawiah nge ka țuan tâk tih pawh i hre âwm tawp si lo va.

Hla siamtu'n a sawi angin a dai hlen tawh emaw ka lo ti a, hmana ka hmangaihna che kha. Mahse, a lo ni aw zawng lo mai.

Zarkawt main road ah i duty haw lam ni awm tak ka hmu che a, traffic jam karah i scooty chungah chuangin kawrlum sen mawi tak mai i ha a, tlai khaw dur leh ruah tla siar siar karah khan i va'n mawi chungchuang tak em!

Pangpâr te chuan chuai hun an nei a, chuai lo pâr meuh pawh a chuai țhin. Nang erawh chu kum 7 hnuah pawh i lo la chuai chuang lo va. Ka 'Nipui Pangpar' mawi tak kha ka tawnah vul lo mah la, ni lo, ka tawnah i lo la vul reng a ni tih ka hriat thar leh tak hi!

He thu hi i hmuh atana ziak ka ni lo va, i hmuh pawhin țangkaina a nei hek lo. Mahse, heng hawrawpte tal hian i laka ka rilru put hmang hi min hriatpui se la, ka tâ ni ngai lo tur neih tuma buai rual niin ka inhre lo a, mahse, chu buaina tâ chu ka ni tlat thung si.

Chu chu he ka thu ziahna hmun leh hawrawp maltin hian min hriatpui a, ka 'Nipui Pangpar' i ni kumkhua tawh dawn a, mahse a phunna leilung erawh ka duhna hmun a ni ngai lo thung ang.

Lei țha leh tuia ka chawm loh vang che hian min dem lo la, pàr i chhuahna hmunah chu'ng thil chu kham khawp i hmu a ni tih i pâr mawinain a hril reng si a.