MINUTE KHAT LEH NUNHLUI

A fapa nen an rawn inkai hnek hnek a, school kal rual a lo ni ve ta reng mai!

Zing dar 8 vel a ni a, ka ṭhianpa nen kan work out zo bike in kan inkhalh haw a, ani chuan a fapa school kal tur a thlah mek a, kan inhmuh rualin lehlam a hawi a, kei chuan ka en reng a, a hmui vam ham mai, ṭhaleng dangin an nawm an maka an khalh hnu chu a lo la chul reng reng lo!
Kawng kawia a rawn lan chiah aṭanga chhiarin minute khat chhung vel chu ka khawvel a ding a, chu chuan nunhluiah min pawt lét nghal bawk.

A hmelṭha a, a duhawm a, a mit meng thip lek lek kha ka tuar zo lo ṭhin kha a ni a! A naupan deuh avangin a laka ka rilru put hmang inmûng nasa tak pawh chu kum hnih chhung lai ka up bet hial.

Hun ṭha a lo her a, a tawna biahthu hlan ni a lo herchhuak ve ta a, chu ti maia ka laka tlawm a tum hauh lo! Min hnawl lovin min chhang si lo tih ang deuh khan ka nghawngah hian hmangaihna hruihrualin a hling a, a duhna lam lamah min chaih kual a ni ber mai. Ni eng emaw zat chutiang taka min hnuh kual vel hnu chuan ka tawnah rinawm biahthu a hlan ve ta ngei.

Ka fawh hmasak ber zana kan awmdan te kha ka mitthlaah hian a la chiang em em a, a kawrfual dum leh a kimtlang duhawm em em mai teh kha a va inchawih tak.

Tlangin min sel a, ka chhungte pawhin min dem hial, ani kha tleirawl nasa ve tak kha a ni lah tak a, boruak nei ve hat ṭhin ni mah se ka hmangaihna khan a ngaidam sa vek a, a school tlanbo ṭhin te, zan chhuah a chin te kha hre reng chungin ka theihnghilh a, a tihsual leh tur zawng zawng pawh ka ngaidam sa vek! Ani pawhin mak min ti zawk hial.

Hun hlimawm tak tak hmang dun ve ṭhin mah ila sir khat aṭanga hmangaihna chauh chu a lo tawk zo hauh lo mai a, hmangaihna lam sawi ri ngai reng reng lo ka duhtaki chuan min kalsan hla tial tial a.

Mi tawna vul tura a duhthlannain a khalh kal mek lai khan kei chu mualhla kar danah lengin natna khumah ka mu mek a, val dang tawnah a zahawmna zawng zawng a hralh tih ka hriat phei chuan ka taksa nâ chuan ka thinlung a kài nghal a, thawnthu chu a tawp ta!

Ani chu beisei chi a ni tawh lo va, mahse hriatrengna min hnutchhiah erawh nghilh ni a awm kher lo vang. He hla hian ka'n thlah ang e.

Hlim ni chhiarin tlai ni kan leng,
Nunhlui thlirin thinlai a hnim;
Sulhnu chhuiin rilru ka seng,
Ngaiin ka au, a fan chhungril.

     Duhthu ai ang sam chauh mai maw
     Kei ka chan tawk lo ni dawn le?
     Intawn ni a her chang hian maw,
     Biahthu hlan leh che ka nuam e.

Hrui ang sei se kan hlim ni te,
Nau ang nuia hlim zai vawrin;
Mual liam tawh hnu nunhlui zawng te,
Sira hnawla ngaihlai bangin.

Khiangawi zamual i liam hnu khan,
Tlei ni hmel reng ka tawng si lo;
Suihlung hera lo let leh a'n
Sawm leh che ka zuam bawk si lo