14th May, 2008 (Nilaini)
Ni dang ang bawkin zing dar 5:30-ah chiah ka tho a, ka nu thingpui siam sa tui ti takin ka in a, ka pa chanchinbu chhiar lai chu a hnung atangin ka bih thuak thuak a, inpeih sa thlapa tho chhuak ka nih avangin field lam pan chuan ka kal ta nghal a. Pu Dina tawngtai inkhawm haw lam nen kan intawk a, a dan ngai tein min han nuih suk a, “Good morning” a han ti zauh a, kei pawh chuan “Morning Pu Din” ka’n ti let ve a, field lam pan chuan ka tlan chho ta a. Pu Dina hi kan K|P leader a ni a, a taimain zing tawngtai inkhawm a hlah ngai lo a, a entawn tlak hle. Kei phei chuan ka zah ru hle thin.
Tukthuan ei khamah muangchangin ka insiam a, computer-ah Simple Plan zai ka play a, a hla thu pawh ngaihtuah mang loin ka thiam lai lai ka lo zawm ve a, “I’m sorry, I can’t be perfect” tih lai chu ka thiam chiang hle. In chung atangin ka u-in min lo ko chhen a, ka hman tep tih pahin ka insiamchhiat khum nghe nghe. Kan school awmna hi kan in atangin minute 20 kal vel chauh a ni a, ka bag rang tha tak mai, jansport company siam chu ka la a, ka kal ta a. Ka bag hi a tir atang renga rang a ni bik lo, a tirah chuan a dum a ni a, ka thianpa Biaka nen zion street a kan lei dun a ni. Thla thum vel ka ah hnuah kan ziak rang tan a, school lama ka thiante nen rock band hming kan hriat apiang kan ziak a, correction pen a hek duh viau. Green day, A7X, Simple Plan, Blink 182 tihte chu hla deuh hlek atang pawhin a hmuh chian theih viau bawk.
Nipui lai a ni bawk a, khua a nuamin a thiang tha viau mai. School ka thlen chuan a ngai te bawkin thiante nen music chungchang kan sawi ho a, a thenin dawhkan khawngin an hla duh zawng an lo sa ve bawk a, an ke an per tluk tluk hlawm a. Kan class a hmeichhe thawveng deuh deuh pahnih Ruatpuii leh Rinpuii te rawn thleng chuan an dan ngai te tein an star te chanchin an sawi a, an nui leh vak vak a, an pahnih hian Rpi ti a koh an rem ve ve a, Rpi te pahnih kan ti mai a, kan fiam nasa thin hle. Ruatpuii zawk hi Champhai lam mi a ni a, Rinpuii hi Kolasib mi a ni thung a, kum khat aia tam mah kan kal ho tawh avangin kan innel hlawm hle a, a inkawm tur chi pawh kan inkawm nghet tawh viau mai.
School tan a hun a, chawhma lamah Geography, Political Science leh Education subject kan hun a, khua a lum avangin mipa ho chuan kawr ban kan thlep fur. Third Period-ah Education kan hun a, Miss Mahruaii a lo lut a, a strict em avangin kan ngei fur a, a thil sawi te reng reng hi a sawi fak fak a, a meng kar mai a, kawr ban thleh chu a thil ngaih theih loh ber pakhat a ni. A tam zawk chuan a lo luh hmain kan siam tha vek a, a ngeiawm pahnih Zuia leh Duhsaka te chuan an thlep lui ngat a, a dan ngai te tein Miss chuan an pahnih chuan a hau leh zek a, a lungawi vak lo a ni ang, dar 12 rik hma minute 10 velah class atang a chhuak daih nghe nghe a, kan lawm zawk phian lehnghal.
Class dang ho aia kan chawlhlawk hma deuh avangin school canteen lian lem lo takah chuan thutna tha kan chang ve a, alu paratha leh thingpui chu kan thian ho chuan kan han lam a, tui ti takin kan eiin kan ina a, chutia thu ho mai mai sawi pah a thil kan ei lai chuan science ho an lo chhuak ve tak tak a, inhmelhriat sa kan nih lem loh chuan science zirlai ho nen hian kan inpawh em em lo a, hmun danga kan inhmuh nikhua erawh hi chuan kan innuih ve leh suk thin. Kan school-ah hian Arts leh Science subject a zir theih a, tunah hian pawl 12 – Arts ka zir mek a ni. Science lamah chuan ka naupan lai a tanga ka thian kawm thin Cv-a a awm a, kan inkawmngeih avangin kan class ho chuan an hre fur a, an class lamah pawh hriat ka hlawh phah ve bawk. Kan thil ei chu min rawn zawm ve nghal a, eng eng emaw sawiin kan ri hlut a, a hlimawm thin khawp mai.
Chutia kan titi karah chuan Cv-a chu an class hmeichhe pahnihin an rawn be buai a, mi dang chuan kan sawi ngai kan sawi zawm zel a, Cv-a thiante pahnih ka’n en chiang chu eng emaw hian min mawlh ta tlat mai a, ka thin chu a phu ta dut dut mai a, ka mit pawh laksawnna chang reng reng ka hre lo. Chutiang reng renga hmeltha chu kan school-ah an kal ve tih ka lo hre ngai lo hrim hrim. A hmel chu ka sawifiah thiam dan ber chuan kan school gate bula April par (May flower) nen ka tehkhin ber a, chu chu kan thianho chuan ‘Nipui Pangpar’ tiin kan sawi kher thin. Ngo angreng tak, a duhawm tawk vela thau, thau lutuk ni si lo, Korean hmel lek lek a ni. Ka en reng avang chuan chu nula (nula tih rual chu a la ni kher lo ang) chu a lai hle mai a, a sen deuh ap apin ka hria. |hianpa Ruata’n min nghawk chawrh pahin “Pawisa chu” a han ti a, thian dangte chu an lo tho uaih tawh a, ka lo en nasa hle ni tur a ni, “Kal ang u” an tih lai pawh ka lo hre lo pek a, zak ru ve tak chu ka ni.
Zanah te chuan ka rilruah a awm zui reng a, lehkha pawh ka zir hlei thei lo.
Ngaihzawng ka la neih ngai loh avangin ka awmdan chu ka hrethiam lo a, ka thinah hian min hnawh deuh up up ni ber hian ka hria. Hmuh leh ka chak zek zek a, a tuk school kal baka thlakhlelh ka nei lo. Tleirawl tha za ve tak, lungkham em em nei lo, music ringawt tuichilh leh hman remchan apianga Tuikual venga Valbuanga Jam room lama Jam deuh tlut tlut thin hian hmangaih a tawng a ni thei mai ang em? Ka awmdan chu mak ka ti tak zet a ni.
A tuk atang chuan khawvela hna hautak ber mai chu ka thawk tan dawn ta a ni. A hmasa berin a hming ka hriat a ngai a, a dawtah khawi veng nge a nih? School banah eng nge a tih thin? Class 12 kan pass hunah eng nge tih zawm a tum? Taka, bialpa a nei ang em? Tih tur a va tam em! School ka thleng chu a ngai te bawkin an lo ri leh tluk tluk tawh a, Rpi te pahnih pawh an te ring leh tawh viau. Thianpa Solo-a’n (Solomon-a) Good Charlotte leh Avenged Sevenfold hla thar nalhzia min lo hrilh nghal mawlh mawlh a, Hmachhuana’n a lo tuihnih bawk a. Anni pahnih hian hla chhuak thar an hre thei hle a, kan thianho zingah chuan hla lama kan boss te an ni.
Chutia an thusawi ka ngaihthlak reng lai chuan thil ka hrechhuak thut a, ka hnathawh tur kha! Pawnah ka tlanchhuak nghal a, Cv-a ka hmuh a ngai, chu chu tuna tan chuan khawvela thil pawimawh ber a ni. Gate bulah chuan a lo kal vawh vawh a, ka hmuh rual chuan ka’n hui vat a, zun in bulah ka hruai phei a, “Nimin a canteen-a rawn betu che kha tu nge?” “A tu zawk maw?” “Tarmit vuah lo zawk kha” “Zodini a nih kha, kan class a mi, enga tan nge i tih a?” nui vun vun chung chuan a’n ti a, ka inthiam lo leh deuh a, ka an zuau lai chuan Cv-a vek chuan “I star a ni maw? Hahaha… a fel teh mai a nia” a tih zawm zat a. Huiham! Hna hmasa ber kan zo fel ta; Zodini, Class XII (Sc) Section – A. “Khawi vengah nge an awm?” ka’n ti a, “Mission Vengthlang-ah,” dar a ri a, hmanhmawh takin kan chho ta a.
Ka rilruah a awm tut tut reng a, Zodini chu hmuh leh thuai thuai ka chak a ni. Chhun chawlh hunah chuan ka va chang dawn rua em! A biak chu ka be ngam kher lo ang a, mahse, ‘score’ hrim hrim a ngai. Class-ah te chuan zirtirtute thusawi pawh ka hre mumal lo a, thei leh thei loin Science block lam chu ka va melh leh zauh thin a, class an lak ve vek avangin pawn lamah hmuh tur an awm lo. Ka thutpuite pahnih Ruata leh Chhanchhuaha te chu a rukin thil awmdan ka hrilh vek a, anni pahnih pawhin an hmu chak hle, thian dangte erawh hrilh rih loh tur a ni.
Chhun chawlh dar a lo ri a, ka thinphu chu a rang tawlh tawlh a, canteen lamah kan chhukthla a, an lo thu nual tawh hlawm a, thutna tur zawn paha ka’n hawi vel chuan kil khata ka ‘Nipui Pangpar’ lo vul suah mai chu ka hmuh hmaih lo chiang kher asin! An piah deuhah chuan kan thu ve a, ka awmdan chu keimah leh keimah pawh ka inhrethiam thei lo. Ruata erawh chuan a lo hrethiam ngang mai, ani zawng ngaihzawng nei thang tawh a ni a, ka awmdan vel pawh chu a man chiang ngang mai. Hriat duh nei ni awm tak chuan min han melh a, a hmui phun chuan “Tu ber nge?” a’n ti a, mi dang hriat hlau tak chung chuan Zodini thutna lam chu ka’n melh zauh a. A bak chu class room lamah sawi chhunzawm tawh tur.
Zodini chu nimin ai mah khan ka hmu hmel\ha a, pian nalh tia sawi tur chu a ni lo nain a duhawm em em mai a, ka mitah chuan a famkim a ni. Canteen atanga an chhuak tur te chu ngam leh ngam loin ka melh reng a, an kal liam thlengin ka thlir zui vawng vawng a ni. Kan thil ei zo chu Cv-a nen kan inhmu a, chawhma lama kan sawi bak sawi tur tam tak leh zawh tur tam tak ka nei a ni. A hnenah chuan “Ka hmu a” ka’n ti a, “Tu maw?” “Aw… Zodini… a chhiat lohzia kha…” “I star tak tak em ni? Ka lo sawi ang aw?” “Chi nang, a zahthlak e a, bialpa te a nei awm si a,” “Teuh lo mai, a inno (innocent) lutuk, in inhre tawh turah ka lo ngai char char zawk a.” “Bem ta ila min duh i ring em?” ka’n ti chu Cv-a nuih a za hle ni tur a ni, ka darah a beng thuk thuk a, pum dawm meuhin a nui ta kiah kiah mai a, mi zei lo ve te! “Remchangah ka inhmelhriattir ang che u, vawi lehkhata tih phut chi a ni hleinem…” “Aw le, min tizak miah suh ang che” ka ti a, class room lam panin kan chho ta a.
Chumi kum School Annual Sport lai vel chuan Zodini nen chuan kan inhre tan a, kan inkhel te chu a lo en ve reng a, chu chuan min titang zual sauh a. Football-ah chuan kan champion nghe nghe, final-ah an house (Red) nen kan intum a, si hnih faiin kan chak a, kan lawm hle a, inkhelh banah Cv-a nen kan inbiak lai chuan Zodini leh a thiannu chuan lawmpuina chibai min rawn buk a, ka tawh vawi khatna a ni bawk a, ka mur deuh sung sungin ka hria, ka hamhaih lek lek a, ka hnung lawka ding ka thiante pahnih Ruata leh Chhanchhuaha an lo khuh ring hle, an chimawm kher kher thin a nia.
Ka ‘Nipui Pangpar’ chu furah pawh a par zui zel a, favang a thlen pawhin chuai thei hmel a pu lo. Thlasik chawlh kan hmang a, a kum leh kan han luh tan pawh chuan a lo la chuai reng reng lo a. Exam a hnaih tawh avangin zirna lamah insawrbing a tul bawk si a, inngaihzawn thil vel chu a ngaihtuah tak tak theih loh, ka rilru-ah erawh a awm reng a, kan innel deuh tawh avangin kan inhmuh chuan kan inbia a, kan inkawm ve bawrh bawrh a, a hranpa tak erawh chuan kan inkawm tam lo. Ka zei loh vang pawh a ni ve pakhat.
Tum khat chu inrinni a ni bawk a, exam a hnaih tawh em avangin exam hmaa a tawpna atan hla copy turin thianpa Hmachhuanate in, Khatlaah kal ka tum a, Solo-a a hman loh avangin keimahin ka kal a, Khatla kawn-a ka kal lai chuan Zodini te thiandun nen kan intawk hlauh mai a, ka lai deuh viau na a ka intipa lui a, an kalna tur te ka’n zawt khawmawi ve a, an pahnih chuan zingah coaching (Technical entrance coaching) an lo kal dun thin hi a ni a, a thiannu Marini chu taxi a lo chanpui mek a, ani Maubawk lama phei tur a ni a, chu laiah chuan inthlah an lo tum sa reng reng a. Marini chuan Zodini chu ka thlah chhoh ve leh nghal turin a la ti zui a, ka lawm rilru angreng hle.
Sikulpuikawn thleng kein kan chho dun a, kan kal pah chuan a remchan leh remchan loh pawh ngaihtuah loin ka huaisenna zawng zawng sawm khawmin ka duh thu ka hrilh ve ta thawr mai a, ani a lai, kei ka zak bawk. Sawi chhunzawm tur a vang duh asin aw. Sikulpuikawn kan thlen chuan “Heta tang hi chuan taxi-in ka kal tawh mai ang” a la ti zui! Um Hmm… Min duh lo chiang mai. A va zahthlak tak! Ka hnar chu a lena a’n lenzia mai chu! Iskut ai pawhin a lian zawk hial ta ve ang. Ka lo sawi kher kher a ni.
A karleh thawhtanni school kal chu ka phur lo tak zet mai. Inrinni thil thleng avang khan chawlhni pawh ka hmang nuam meuh lo a, ka zawi ngawih ngawih ni ber hian ka hria. Tumah ka hrilh ngam lo a, thawhtanniah chuan dan pangngaiin school chu ka kal a, kan bang hma hlauh a, a tukah chuan a hma ni ang bawkin hun ka hmang a, chhun chawlh pawhin ka chhuak peih lo a, class room-ah ka tawm tlat a. Kawngka atangin Ruatpuiin min rawn ko a, “Hei, an hmu duh che” a tih avang chuan ka chhuak thuai a, Marini a lo ni a, ka phu deuh zawk nghe nghe. “Zodini’n hei lo pe rawh a ti a” tih pah chuan lehkhathawn hi min pe ru zeuh a, a kal leh nghal daih a. Mak ka ti em em a. Chhiar chak teh mah ila class room chhungah chuan a chhiar chi si loh a. Ka kekawr hnung ipte-ah ka ak nghal hmak a.
School ban veleh hmanhmawh takin ka haw a, room-ah ka lut nghal a, ka’n chhiar chu a va’n pawi tak em! A tuk atang chuan study leave kan nei tawh a, kan routine a inan loh avangin exam lai chuan kan inhmu ngai lo a, exam zawh hnu pawh chuan a tua mah kan inhmu zui meuh lo, thian inkawm ngeih zual chu kan la inkawm reng tho a, a then mahni khaw lamah te an haw hlawm a, exam zawhni bak kha chu tun thlenga la hmuh zui miah lohte pawh ka nei.
Result a han chhuak chu kan thianho chu kan pass tha hle a, thian thenkhat pass ve lo an awm avangin lawm erawh a kim lo deuh. College hrang hrangah kan lut hlawm a, nuam pawh kan ti tlang hle ni tur a ni, inhmuhkhawm pawh a har tawh khawp mai. Tichuan, a khat tawkin re-union kan nei ve leh zeuh thin a, han inhmuhkhawm nikhua hian ka ‘Nipui Pangpar’ chu a vul that leh that loh min zawt fiamthu thin, kei lah pek chuan ka thuruk chu tu mah hrilh ka tum lo a, chhan enah pawh ka en ngai lo.
23rd November, 2014 (Pathianni)
Chawhma inkhawm banah Synod Hospital, Durtlangah thian thenkhatte nen kan kal a, kan thiannu pakhat, khawsik avanga kar khat zet awm tawh chu kan tlawh ve a, rin ai takin a lo harh a, mawi tawk tak kan thut hnu chuan chawhnu inkhawm leh hman kan tum hlawm avangin chet chhuah mai kan rawt a, a drip khai lai chu a zawh dawn tawh avangin chhuah pah chuan nursing station-ah chuan kan sawi nghal a, “Room No. 242 saw a drip a zo dawn a” “Aw le, ka lo kal nghal” tih pah chuan nurse pakhat chu a lo hawi thuai a, Zodini a lo ni a, kan inhmu thut chu mak kan ti dun hle mai a, sawi mai tur pawh kan hre lo. Ka rilru-ah hmana a lehkhathawn min pek kha a lo lang a, heti hian a inziak nghe nghe a:
“Hmannia i thusawi kha ka rilruah a awm reng a, school banah gate bulah min lo nghak rawh” tih te mai hi.
23rd June, 2015
