DUHAISAMI

Chhuah lam atanga ni chhuak mawi tak chuan kan awmna lai chu a rawn chhun tawk vel chiah a, Rih dil kianga Mizoram sorkarin Tourism Department hmalaknaa 5 Star hotel nuam tak a din in var mawi leh thianghlim em em bathlarah chuan thuin Vanglaini chanchinbu ka chhiar mek a ni. A phek hmasa berah chuan ‘Ramri chungchangah India leh Mizoram inrem’ tih hi a lo chuang kalh mai a, Mizoramin independent a hmuh hnuah pawh ramri a la fel hleihtheih loh avangin buaina tam tak kan tawk chamchi reng a. India (Assam) nena kan inrina lai pawh chu chiang fahran hian a lem nen an tilang kalh mai bawk a. A rang thei ang bera hung fel tur a nih thu pawh a chuang.

Ni hnih kaltaa damchhung atana ka nupui ni tura intiam hmeichhe hmeltha em em Duhaisami chu ka kiangah dingin thingpui leh a hmeh tuihnai tak min lo kensak a, a hmuia fawh zauh pahin lawmthu ka hrilh a, inbual turin bual in lamah min kalsan leh ta a, kei chuan thingpui in pah chuan chanchinbu chu ka chhiar zel a, India ram chanchinbu hoin engtin tak ziak ang maw tiin ka tablet chu ka la a, internet lamah ka’n zawng kual a, awlsam tein hmuh tur a lo awm mai a. (Internet speed hi 15 mbps lai a ni nghe nghe). Sap hoin ‘Good Morning’ an tih zawng zawng hi chumi zing ni chhuak chuan a rawn herchhuahpui emaw tih mai tur a ni hial.

Duhaisami nen kan intawn dan hi tlem a zawng ka’n sawi hmasa lawk teh ang. Ka hnathawhna Mizoram Agricultural Development Corporation hi Mizoram Independent kuma din a ni a, kum khat ka thawh hnu kum hnih kalta khan District Manager turin tuna ka awm mekna Behliangchhip-ah hian min sawn a, Jampui District-a bul tantu kan nih avangin hna pawh kan thawk nasa a, Agricultural Loan kan pek chhuah nghal avangin kan company pawh chu kan lar chak ve hle bawk. Behliangchhip Municipal Corporation chairman nen pawh kan inhmelhriat tha tawh hle a, tum khat chu an ina zanriah ei turin min sawm a, office ban veleh an in lam pan chuan ka inkhalh phei a, a chhungte chu min hmelhriattir hlawm a, chutah chuan a lawm thil danglam tak a thlen tak ni, a fanu neihchhun ka han chibai chiah chu ka kutah hian a tek chho chuai chuai mai a, chu chuan ka thinlung a thleng rang kher asin! Chuta tang chuan Duhaisami nena kan thawnthu chu a lo intan ta ni.
Kum khat leh a chanve zet kan inzui hnu chuan inneih zai kan rel ta a, anni UPC (Reform) kohhran an ni a, kei Prebyterian kohhran ka ni thung a, mahse chu chuan kan inneih chungchangah harsatna a thlen lem lo. Mizoramah chuan eng kohhran mai pawh (pawl chhuak tiam lohin) kan inneih pawlh vek tawh a, inneih hnuah erawh a mipa lam kohhranah an lawi tlangpui. Ka pa hnathawhna avangin New Capital Complex, Sairang Sihhmui-ah quarters kan luah a, kan complex-ah hian chhungkaw zahnih dawn lai kan awm a, kohhran khatah kan lawi za a, kan inkhawmho mai thin.

Kan inneih dawn avangin thla khat chawlh ka la a, Behliangchhip atang chuan ka haw ve vang vang a, kawng a nuam em em a, rulngan pa ang maiin a dum hlarh mai a. Mizoram PWD te PSU anga an kal tak avangin an hna a tha thei em em a, sorkar pawhin a chhawr tangkai hle a ni.

Kan inneih hnuah hun nuam tak (honeymoon) hmang turin Lengpui atangin Mizoram Airlines thlawhnain Zokhawthar Airport kan thleng a, minute 20 chauh kan thlawk bawk a, Zokhawthar atangin Local Bus-in Rih Dil lam kan pan nghal a, Khuangchawi thla chawhnu lam a nih tawh avangin khua chu a vawt deuh var tawh a, he hmunah hian hun nuam leh hlimawm tak chu kar khat chhung hman kan tum ta a ni. Kan thlen tukin zin mite hruaitu (Tourist guide) hoin Mizo hmun pawimawhte min fanpui a, Culture and Heritage Department lamin khawih danglam miah si loin uluk takin an lo enkawl a, kan nupa chuan nuam kan ti hle a ni.

Tichuan, zan lamah hun nuam tak kan hmang zel a, kan thlenna hotel a zaina pindanah chuan zu fang tui tak kan in a, Mizo zaithiam leh rimawi tumthiam tak takte’n an zai leh rimawi hmangin min awi a, leikapui zai ngei mai chutiang hotel changkanga ngaihthlak tur a awm chu hlawkthlak kan ti kher asin! Dar 12 velah kan mu a, zing dar 7 velah tho lehin bathlarah ni lum ka ai a, a tira ka sawi hun kha kan thleng ta chiah a ni. Chutia ka nupui inbual tura a kal hnu chuan bathlarah chuan ka lo chhing leh sek a, kan nu inbual zo chuan min lo sawi nawk nawk a.

Ka harhchhuah meuh chuan tlai lam dar 4 a lo ri tawh a, ka nu chuan kawngka kik dat dat pahin “I chhuak dawn ta lo em ni?” a ti a, ka harh zawk a, Duhaisami kha! Ni lo, ka mumang mai mai a ni! Ka harh chiang tulh tulh a, ka mumang avang chuan ka lung a leng tulh tulh bawk a. Ka tho chhuak chu pen leh lehkha phek ka la a, ka mumang chu ka ziak chhuak ta mawlh mawlh a, rilrua Mizoram Zalen hun tur suangtuah ran chung chuan ka thuziak chu thianpa Tsa hnenah ka pe phei ta a.