FAM LALZOVA

Fam Lalzova

Vawiin hi hla phuah thiam, Lalzova thih cham a lo ni leh ta reng mai. A chanchin tlem tlem ka lakkhawm hi tarlang teg ang.

Lalzova (1924-1945) hi kum 1924, pawltlâk thla (December) ni 2 khan a piang a, kum 21 mi chauh niin December ni 8, kum 1945 khan a boral a ni. Kum 21 chhung chauh khawvelah awm mah se, hla 50 vel zet a phuah hman a, heng a hlate hian Mizoram dung leh vang a fang hneh hle a ni.

Lalzova hian rimawi a ngaina hle a, Spanish guiter, Hawaii guitar, violin, ukelele-te hi a tum thiam hle a ni.  Amah hi mi lungleng mi a nih zia a hla tam tak atangin kan hmu thei a, a hunin atawn fuh phei chuan hla phuah a awlsam hle niin an sawi.

Kum 1960 hma lam kha chuan Zoram tluanah tlangvalte’n se dar tia zet tingtang awrhin, zan thla engah mimal leh a huhovin a hla te hi an sa uar hle thin niin an sawi. Zan thla engah nulaten luhkapuiah la an kai a; an bulah an inleng tlangval-ten Lalzova hla an han thlawh meuh chuan a hre pha nu leh pate’n an vanglai ni dawn kirin mutmu an tuah hlei thei lo a ni ber e, anti thin!

Indopui II-na lo chhuah khan Pawl nga a zo hman chiah a. Lalzova hian hla phuah mai bakah, lemziah leh thil lem siam lam a thiam em em bawk a, hetih laia SDO, Wiscott chuan Aizawl-ah a hruai phei a. Aizawl atang chuan C.Thuamluaia’n lehkha zir turin Calcutta-ah a hruai a. Sikul luhna tur anhriat lawk loh avang leh a lunglen em avangin Mizoramah a lo chuang chhuak leh a. Lehkha zir chu a bansan ta a ni.

Kum 1943-1945 chhungin hla 48 vela phuah niin sawi a ni a. Sakhaw lam hla 3 leh hla lenglawng 5-te bak a hlate chu love song, lengzem kan tih te a ni thung.

Kum 1945 December 2-a a piancham vawi 21 na a lawm hnu December ni 8, 1945-ah khawsikpui avangin a boral a. Hla phuah thiam leh lungleng hmingthanga sawi a nih avangin, a chanchin ziahna leh kohnan 'Fam Lalzova' tih a ni thin. A chanchin hi a ngaihnawm em em a, sawi kilh kelh ka tum hran lo, chhiar tur a awm nualin ka hria. Heti ang lama tui te tan chuan! Heti chin hi a chanchin tlangpui kan lakkhawm theih nise a tha ang.

Cp

Rev. Lalhmingchuanga Zongte

*Rev. Lalhmingchuanga Zongte in 2014 kuma a post hi chhiar thar teh ang*

“PASTOR PIANG THAR LO” AN TIH KHA KA LO TAWNG CHHUAK LEH E

Hmannia SR-a ka thu post comment-tu thenkhat chuan Pastor piang thar lo, Pastor tisa mi, Pastor ngaihtuahawm tak, Pastor chapo, Pastor tawngtaipui ngai titein min sawi a, a then hi chu a dik ang. Thenkhat chuan an biala ka awm an hlauhziate pawh fiah fel takin an sawi bawk. Khatianga min titute kha ka tân an hlu khawp mai a, Mizorama Kristianna kan kalsualpui dân min hmuh fiahtir leh zualtute an ni.

MLTP Act, MLPC Act leh Zu issue hrim hrim kan khel dân atang hian, kan kalsualna lai chu tlêmin kan lo thai lang ang e.

Zu issue emaw, corruption issue emaw, thil dang pawh kan khel nasa fu a, a tûl bawk a, kan khel zêl ang; mahse a sâwt tak tak dâwn lo. Hei aia bul zâwk hi hmaih lian tak kan nei. Mizoram mipui, sorkâr leh kohhrante hian RULE OF LAW pawimawhna kan zir a, nasa taka kan inzirtir a, dân rorêlna hnuaia awmze neia nun dân kan thiam ve hma chuan, dân chihrang eng zât pawh hi legislate mahila a sâwt tak tak dâwn lo.

Dân chu a awm a, kan bawh chhe tlâng dial dial a, kan inngaithiam tlâng dial dial bawk a. MLTP Act a hlawhchham titute hian, MLPC Act pawh hi eng ruai a nih ring suh u. Zu lei thei chin kum bithliah tih te, zu in chunga motor khalh phal loh tih te hi thil thar êm êm pawh a ni hlei nêm, MLTP Act kan bawh chhiat ang tho khân kan bawh chhe leh ang a, kan inngai thiam leh vek ang. Misual man leh hremna mumal awm lohna, "voluntary felna" ringawt rinrâwla neihna ramah hian ram kalsiam rêl a har a nih hi.

Mizoramah hian engtizia nge dân palzûtna a hluar êm êm a, a tuate mah hian dân hi kan zah rêng rêng loh mai le? A chhan chu hei hi a ni: Kristianna kan kal sualpui nasa lutuk a, crime kan spiritualise vak vak a, ngaihdamna hming hi intihthlarau nân kan hmang a, dân leh dikna kan hmu negative a, kan hmu tisa a. Hei hi kan sim loh chuan kan la chhe tluang zêl dâwn.

Dikna aiin khawngaihna a sâng zâwk ti chung si a, dikna pawh thleng pha loten khawngaihna kan la hlatzia hrethiam chuang miah lo, intithlarau ve êm êm si kan ni. Khawngaihna tlawh chhanin ngaihdamna suak thu kan hril a. Simna tel lo ngaihdamna thu hi dikna duhtute den hlumna lung atân kan hmang a. Hmannia SR-a ka thu post-ah pawh mi thenkhat chuan Bible-in ngaihdamna chungchâng a sawite chu a tlahlang leh a bawp lawka lain, min den nân an hmang nasa hle. Thenkhat chuan Pastor ka nih avânga sual zawng zawng ngaidam vek turin min phût hial a ni. Sual zawng zawng ngaihdam hi Pathian policy pawh a ni hauh si lo va. Ni sela chuan simna thu hi hril a ngai lo vang. Pathianin a ngaihdam loh hi Zoram hian a ngaidam tam lutuk a, hei hi Pathian zah lohna lian tak a ni. Hetiang hi ngaihdamna dik tak pawh a ni lo va, “ngaihzamna” mai a ni a, hlauhawm tak a ni.

He kalsualna hi tute emaw intithlarau mi fâl leh hlimsâng rawngkaite kalsualna mai a ni lo. Ni sela chuan kan rama dikna leh dân rorêlnain chuti lutukin a tlûk chhiatpui lo vang. He kalsualna hi Zoram kalsualna a tling a, chuvang chuan kan chhiatpui a ni zâwk.

Tute mah kan bâng lo. Sorkâr thuneitute mai ni lovin, Kohhran Upa leh Pastor-te meuh pawhin dikna kan tan ngam lo va. Miten thlarau lo min ti ang tih hlauh vângin misual kan ngaidam der a, ngaihdamna suak hmangin spiritual popularity kan khêl a. Kan ram chu kan tichhe zo ta vek a nih hi. Hitler-a sorkârna hnuaia mihring suatna râpthlâk tak leh thil dik lo tam tak dodâl ngam tlêm tê zinga mi, dikna tana a rinna martarpui ngam pastor theologian ropui Dietrich Bonhoeffer-a’n “cheap grace” a tih ang kha Zoram Kristiante chuan chhuan tawlawl berah kan neih a, cheap grace hmangin cheap popularity kan khel a ni ber.

Pathian thu ngun taka kan zir chuan, ngaihdamnain a tum ber chu tihsual palh thil avâng emaw, sualna avâng emawa inlaichinna (relationship) keh chhia tuam dam lehna (reconciliation) atân a ni tih kan hmu a. Dikna rah beh nân a ni lo. Dikna dân chuan a tih tur chu a ti ngei tur a ni. Entirna awlsam tak pakhat kan neih chu, Australian missionary Graham Staines-te pafa hâl hlum an nih khân, Graham Staines-a nupui Gladys Staines chuan a hâl hlumtute Pathian hminga a ngaihdam thu a puang a. Thinlung lamah a ngaidam a ni; an tân mittui nên a lo tawngtai hial thin pawh a ni mahna. Chuti chung chuan thil sual titu, Dara Singh-ate chunga court rorêlna thuchhuak chu chhe te pawhin hnuh hniam phah a ni chuang lo. Kan inngaihdam avânga dan rorêlna a zuzi zêl dâwn te chuan miin a nupui that turin misual ruai ta sela, an man chhuah hmâin, “Ka nupui thattute hi ka ngaidam e,” a ti ang a, a him pial mai dâwn asin.

Khawngaihna chu dikna aia sâng a nih avângin a lêr sâng takah a awm a, dikna chu chu aia hniam – a kâkpuiah a awm. A kâkpui pawh lâwn thleng peih si lo, a lêr sâng thleng ta anga insawi tlat thin te hi ka mi rinhlelh zâwng an ni.

Kan ram hi Krista chanchin tha intâr lanna, ram nuam leh ram râl muang ni tura kan duh a nih chuan zu aia zir hmasak tûr kan nei e.

ANI LEH KEI

ANI LEH KEI

Ani chu lirthei man to takin a kal a,
Kei ke-in ka kal thung a.

Ani chuan ke-a a kal ve chhunah cheng sing chuang man a rah beh a ngai a,
Kei chuan tlawm-tlo ka zawng a.

Ani chu silhfen man tama thuam a ni a,
Kei erawh tlawm têin.

Ani chu mi hausa zinga khawsa a ni a,
Kei erawh zâwl tawk zingan

Ani chu phaiah te, ram dangah te a awm țhin a,
Kei erawh Mizoramah.

Sum leh pai a ral a, silh leh fen kan hlip a, kan thil neihte a bo zo a;

Ani chuan saruakin hlutna a nei tawh lo va,
Kei erawh ka la pangngai reng.

17.11.2017

KA PHAL SI LO

*KA PHAL SI LO*

Mahriaktea laitual ka len laiin,
Angel ianga zaidam leh nunnem
Sakruang mawina tinrenga thuam kha
Rual kawm hmunpuiah ka tawng a
A zuna uai a na ngei e

A biahthu hlan leh kam chhuak zawng a thlum
Duhsakna leh hmangaihna tinreng
Rinawm thu di pawh ka tan a ti
Țha leng tawnah chhawl ang ka uai
A ngaiin tlai khua ka var leh țhin

Intawnni tur thlirin rinawm kan tiam
Hun leh tui lianin min dal lo'ng e
Ti-a duhthu leng ka sam laiin
Chhim thli ianga thinlai țhawngtu
Hlimthla suak mai maw i lo tar lan?

I sakhmel mawi kha a lem maw lo ni?
Dawn lungruka ka duhaisam kha
Rinawm biahthu kan tiam dun zawng nen
Thamrala'n zawng ka phal si lo
Der thiam țhaleng thlung lu tihaitu.

7/11/17
10pm

HLA KUNGPUI LUAHTUTE CHANCHIN

http://googleweblight.com/i?u=http://nunkhua.weebly.com/hlakungpui-luahtute.html&grqid=NIOMs85H&hl=en-IN

AN CHELH LO'NG CHE

Hlim ni chhiara tlai ni lengin,
Pheilai kan khai hmatiang kan sawn;
Lungngaih beidawn thleng țhin mah se,
Kan zam dawn lo, kan kal zel dawn.

chorus:
Tu mah rengin an chelh lo'ng che,
Chak tak leh huai takin awm rawh;
Hmatiang sawnin kalsiam rel la,
Lalpa'n a awmpui zel ang che.

Hmanah Lalpa'n Joshua hnenah,
I rah apiang ka pe ang che;
Ti-a a lo tiam tawh ang khan,
Ringtute tan a pangngai reng.

Aw nang ringtu kros kawng zawha,
I chatuan hmun i panlai khan;
Buai manganna lo thleng mah se,
Lalpa'n a kiansan lovang che.

23.9.2017
saturday 11pm

ORIGINAL SIN

'Original sin'

Zan mu chhing lova ka dâwn, ei leh in pawhin ka nuna awmzia an neih tak loh chhan hi kha i sakhmel leh i mit meng te kha, kha thil sual hlauhawm, ka chhungrila hlimhlawp tenawm tak min thlentu kha....

Huleng val rualte'n țawngkam duhawm tinreng hmanga i kianga len theihnana chham hla an chham lai khan...

Min hrilh teh, eng tiang chiaha he ka hring taksâa lo lut thei nge maw i nih le? Chhungril fanin ti rîl i tikhùr a, infiamna hlauhawm tak chu a ni phawt mai, nang hi thlahtu bul sualna ka chhawm kha em maw i nih dawn le?

Inspired by Elton John's original sin

22.9.2017

ICE CREAM

Tur ni a hrang
Vangkhua a lum

Ka lei ice cream
Ka tum rualkhum

I tan tiin
Hlan che ka tum

I hnen ka pan
Khuang ruah lo sur

Ka khalh ka bike
I hnen thlen ka tum

Ka zawr ka huh
Nang erawh him pialin

A i10-ah i chuang daih si! :'(

sept 16, 2017

ONE MAN, ONE WOMAN

ONE MAN, ONE WOMAN

Kum 1977 daih tawha tihchhuah ABBA: The Album-a a hla 3-na, Benny Anderson leh Bjorn Ulvaeus te hla phuah 'One man, one woman' hi i la ngaithla lo a nih chuan i thil tih lai kha chawl zawk la, youtube lamah zawng nghal ang che.

Tunlaia Mizo hmeichhe zinga a zai ka ngaihthlak hnem ber dawttu, (Daduhi dawt tihna a nih chu) Tlangnuam nula zaithiam Cindy'n a hla duh em em a lo ni kher bawk nen. A hla hian lairil a fan a, gospel hla ang maiin thinlungah thu a sawi thei nia!

Hmeichhia leh mipa nupaa an lo insiam chiah hian hmangaihna lipuiah cheng dun mah se chuti taka thil awlâi a ni hauh lo a ni chêk ang chu, harsatna leh buaina tam tak kara hmangaihna pâr tlan chu thil harsa a nih châng a awm fo.

===============================

Zingkar ațanga mood a fuh loh laklawh chuan tukțhuan ei laia hmel hlim put a har tawh a, thil sawi tur tam tak awm mah se sawi lovin kan tlingtla fo mai. Chhun lam hnain min hmuak a, tûm hmara in kan chhuahsan hi chuan kawngkapui inkhar ri hi a ring duh zék lehnghal a. In chhung lama lo awm tan chuan rilru a na lo thei lo ve bawk a ni.

No smiles, not a single word at the breakfast table
Though I would have liked to begin
So much that I want to say, but I feel unable
You leave and slam the door
Like you've done many times before
And I cry and I feel so helpless

===============================

Mahse, harsatna te hi thleng fo mah se chin fel dan kawng a lo awm ve zel a, inhmangaih leh inkawm ngeih tak, Pathian leh a kohhranho hmaa kumkhuaa leng dun tura intiamte chuan rinawm takin, "Nang leh kei, a tawp thlengin" an ti leh nge nge țhin.

One man, one woman
Two friends and two true lovers
Somehow we'll help each other through the hard times

One man, one woman
One life to live together
One chance to take that never comes back again
You and me, to the end

27th Aug, 2017

MIZO MILARTE HMING TAK cp from whatsApp

MIZO MILARTE HMING TAK

1. Awithangpa: - Ahming tak chu Hmarlutvunga (Hla phuah thiam hmingthang.)

2. Burkhawnipa: - A hming tak Khawtindala (Tualchhunga huaisen leh pasaltha chanchin ngah tak a ni.)

3. Bengkhuaia: - A hming tak Lalsahulha (Rolura thlah Siallam Lal,).

4. Ch.Pasena: - A hming tak Chawngnghilhlova (Kohhran School enkawltu pawimawh lehzirlaibu ziaktu, Mizo zinga London-a zir hmasa ber. Ch. Pasena tih chu, Chawngnghilhlova Pasena tihna a ni. Pasena tih chu koh fiamna a put hlen tak a ni.)

5. CZ Huala: - A hming tak Saikhama (Hla phuah thiam CZ Huala tih hi Chhakchhuak Zawnghuala tihna a ni).

6. Damhauhva: - A hming tak Lallianchhunga (Khawbung khaw hla phuah thiam).

7. DK Kawnga: - A hming tak Hranghnuka (School hotu hmasa, a larna hming DK Kawnga tih hi Denga Khiangte, Kawnga tihna a ni)

8. Dr. Pika: - A hming tak Suakphunga (Mizo Doctor hmasa)

9. Dr. Saptea :- A hming tak Sapphunga(Mizo Doctor hmasa Pu Lalkhama IAS (R) puzawn).

10. Lalkherha: - A hming tak Chhunphunga (Biate khua Pathian thu hriltu hming thang).

11. Lalmama :- Ahming tak Lalhmingthanga (Hla phuah thiam, Serkawn Headmaster hmingthang tak chu).

12. Leta :- A hming tak Raldoleta (Matric pass hmasa ber1910).

13. Muka:- A hming tak Lallianthanga (Tirhkoh Muka tih huai huai)

14. Nuteii:- A hming tak Varhlunchhungi (TirhkohMuka nupui, Mizo hmeichhe zinga Matric pass hmasa ber).

15. Patea: - A hming tak Zaliana (Hla phuah thiam, ‘Khawbung Patea’ tih a ni thin).

16. PS Chongthu:- Ahming tak Pahlira (Mizo rimawi tum thiam hmasa leh hla phuah thiam PS Chongthu tih chu Pahlira Sena Chongthu tihna a ni.)

17. PS Dahrawka:- A hming tak Kaphnuna (Mizo ran doctor hmasa ber leh lehkhabu ziaktu,a hming bula PS tih hi Pawisa sem tih na ani)

18. Rev. Chuautera :- Ahming tak Chuaukunga (Mizoram Baptist Kohhran Pastor hming thang, “Kristian Vanram kawng zawh Thu” lehkhabu hmingthang lettu).

19. Rev. PD Sena:- A hming tak Pangdailova (A pu in tumpang sial a kah theih avangin an in tumpangin a rial lo e tiin a hmingah an chawi a. A hming bula PD tih lai hi Pangdailova tihna a nia, ‘Sena’ erawh an koh duatna hming.)

20. Rev. Liangkhaia:- Ahming tak Hranchina (A tet laia an thawina saserh lianga an khai avanga a larpui hming hi pu a ni).

21. Rev. Fehtea :- A hming tak Kawlhnuna (Pahmei fa upa a ni a, apa'n a fehpui tirha a la tet em avanga fehtea tih tak a ni).

22. Sub. Hmuia: - A hming tak Rochhingpuia (Mizo Subedar kai hmasa pawl, tuna ‘Chawnpui Veng’ tih hi ‘Hmuia Veng’tih ani thin).

23. SR Vala:- A hming tak Selkhuma (Mizo IAS lar tak a ni. SR Vala tih hi Selkhuma Ralte,Vala tihna a ni).

24. Siampuii Sailo:- A hming tak Lalthansiami (Mizo hmeichhe zaithiam chuai thei lo).

25. Taitesena:- A hming tak Ralthatchhunga (Chhim leh hmara pasaltha hmingthang mitin hriat).

26. Telela: - A hming tak Darchhingpuia (Mizoramin Assam Legislative Council- a aiawh (member) neih anphut avanga Jail tang panga zinga pakhat Mizo Politics avanga tang hmasa ber an ni.)

27. Vanapa:- A hming tak Chawngzachhinga/ thangzachhinga (Chawngthu Vanchiau hnam a ni. A fapa hmingah pawh ‘Vanchiauva’ a sak avanga ‘Vanapa’ tih a ni. A hming satuin Chawngthu hnam zawng zawng kha chhing turin tiin Chawngzachhinga a sa a. Mahse a lo puitlin chuan Chawngthu hnamchang a chhing lo e, hnam dang zawng zawng pawh a chhing e,tiin Thangzachhinga an ti huai huai a. Chu chuan a lai-ah hming a chhilh tak hial avangin mi tinin ‘Thangzachhinga’ tiin anhre lar ta zawk a ni).

28. Zikpuii pa - A hming tak chu KC Lalvunga (Mizo zinga IFS Indian Foreign Service hmasa ber leh thu leh hlaa mi ril, Writerof the Century a ni. A hming bula KC tih hi Khiangte Chawngthu tihna a ni.

DANGLAMNA THLEN RAWH

DANGLAMNA THLEN RAWH

1.7 GPA chauh nei chunga College chhuahsan chu a hrehawm khawp ang. Keini ang duang paw'n 6 aia hniam chu kan score duh bik lo a nia. Nimin mai khan a zirlaia lo fail ve fo țhin pakhat chuan Dillar University-ah thu ropui tak a sawi a, min hneh em avangin a thusawi țhen khat la chhuakin a sawi tum hi ka'n tui hnih ve teh ang.

"Remember just because you're doing a lot doesn't mean you're getting a lot more done."

Thawk nasa ve viaua kan inhriat pawh hian hmasawnna kan hmu lo fo. Kan hahpui tak thil pawh hi kan hlawhtlinpui kher lo a, a tawp thlen hmaa kan chawlhsan a nih ngat phei chuan kan hah thlawn a ni mai!

"Don't confuse movement with progress"

Kawla ni chhuak chhiara a sur a sa hnuaia kan beih ve fat fat-ah te hian hmasawnna kan insiam em tih hi inzawh nawn fo a țul. Awmze nei lo leh tum tak takna tel lova thil tih ve ngawt hi hun khawh ralna mai mai a ni thei tlat.

"Dreams without goals are just a dream"

Rilruin ruahmanna kan siam a, hlawhtlin ngei tumin kan bei ve hram hram a, kan thlen tumna hmun tak kan hriat chian leh si loh chuan beidawnna ruamah bawk kan chhuak leh țhin a, kan rilru ruahmanna te chu a tak hmuh tur awm lovin a thâmral leh mai țhin.

"Make a difference"

Ti ve viauin inhre țhin mah ila, kan thil tih chuan a țha zawnga danglamna a thlen a nih loh chuan awmze nei lo, tih loh nen thil inang reng a ni thei. Kei ni lam erawh chuan ngai kan awh thei tawh lo va, hun leh tha tam tak, eng mah lo maiah kan khawhral tihna a ni thung ang.

Hetiang thupuia neitu, fail țhin khan tunah chuan khawvel ram a fang chhuak a, hollywood khawvela mi lar ber zinga mi niin film lama chawimawina sang ber Oscar te, Golden Globe leh award dang țhahnem tak a hui țeuh tawh! Sum leh pai chhiar sen loh nen a dam chhung hun a hmang tawh ang a, a thih hnu pawhin a nung reng ang! Denzel Washington, zahna chibai ka buk a che.

16th Aug, 2017

KAN CHIAR!

KAN CHÎAR!

Tlai khua a lo ngui a,
Sathau khawnvar leh thinlung
Êng pahnih inkarah
Zanriah tui tak leh i nui mâwi,
Mamawh bulpui ber pahnih
A aia thlan nàhawm awm chuang lo,
Duhaisam kimna ngei chu.

Biahthu tìnkim hlanin
Zankhua kan tùm tawi,
Lai khuma zalin
Hmangaih lipui kan chèn.
Fur khaw hnâwngin
Dang ro a hnàwn,
Vawkhniahzawn thla hnu khâwiah
Hniak chhîar si lovin kan chîar!

3rd aug, 2017

ZAN KHAT ATAN

Ka hmaah a țhu tlat a
Zan khat atan darkar khat,
Biak leh khawih phâk ni lo,
Mitthla ni bawk si lo
A thâmral leh mai țhin a,
Boruakah te chuan ka zawng a,
A ngaiin vaihna khuavel a zau
A hming lamin thinlung theih tawpin a au.

Beiseina erawh a nung reng a,
Zan khat atan darkar khat
Ka hmaa inlan a bang lo
Pawh theih ni bawk si lo
Hun bi ngaiah a liam leh a
Thinlungin a au zui leh a
A liamna lamtluang lasi țum kawng
A ngaiin thinlungin rinin a zawng.

Tawn ni her chhuak leh se la,
Zan khat atan minute khat chauh pawh
Ri chhuak loa au țhin thinlung kha,
Sawi chhuah tur neiin a inring tawh.
Duhaisam rama chentirtu kha
Zawhna tam tak a zawt ang a,
Bo leh tawh lo tura sawmin
Chatuan atan a chelh tlat tawh ang.

30th july,  2017

AN KHAI TA E

AN KHAI TA E!

Hmana laitual mawi țhintu,
A lenrual tana ngaihawm zual;
Hlimte'n hringnun hmang ve maw?

Hun bi chhiara nun hmangtu,
Tawrhna thlentu a hringnun sual;
Thlarau lamin peih tak maw?

Khawngaih ngena dam diltu,
An chhànnain a tihnual;
A tana ding ngam awm tak maw?

A thiltih sual thihna thlentu,
Chatuan khawvel panin a liam;
Siamtu angchhung lawi tak maw?

july 30, 2015

LALNU ROPUILIANI THLAN - B. Lalrinliana

LALNU ROPUILIANI THLAN KHAWIAH NGE?
-B.Lalrinliana

Lalnu Ropuiliani thlan awmna hi zawn çhhuah a, haichhuah nise tiin Hnahthial Group YMA Conference chuan kun 1996 khan a rel a. Chumi chhuichiang tur chuansub-committee dinin, hma lak nghal a ni.

Kan hriat theuh angin Ropuiliani an man hnu kum 1894 atang kha chuan an lalna khua Denlung chu an mipuiten Ralvawnga an pemsan tak avangin khawram a ni ta mai a, Saihnuna lal hma kum 1919 thleng khan khawram a ni.A bul tan nana ka’n sawi duh chu a hma chuan Denlung leh Ralvawng hi Hnahthial Group YMA huam chhung ami ve vean ni. Group committee pawh hian a khawi zawk pawh hi Ropuiliani thlan awmna nise, pawi tihna tur a awm lo. Kan tum ber chu Chhimlam Lal huaisen leh lar thlan zawn chhuah a ni.

Tichuan sub-committee chuan Denlung leh Ralvawng tlawh ve vein, thil hre deuh leh upa la damte kawmkual bakah, lehkha bu hrang hrang atangin Ropuiliani chanchin leh thlan hmun chu chhui a ni ta a. A lo rei deuh a thlan hmun inchuh ang deuh lek leka a kal ta hi a pawi a,chumi khami chuan chuti chuan a sawi tih lam kan sawilang lo ang a, lehkhabu ziak hma leh hnu hian upa kan kawm ngeite thusawi pawh a danglam leh tak nual avangin, Ropuiliani te History atanga thil chiang kan hmuhte i lo tarlang mai ang:

Lalnu Ropuiliani hi Chittagong atang khan ruhro ni lovin, ruang ngeia hawn a ni:
Lalnu Ropuiliani Chittagong jail-a a thih khan, Jail superintendant chuan Lunglei Bawrhsap hnenah report a rawn pe a Lunglei Bawrhsap chuan a lehkha chhanna ah ti hian a ziak;
“G.Lala interpreter & 10 Lushai are going to Chittagong to fetch Ropuiliani’s bones… * Heta bones a hman hi Pi Lalsangzuali Sailo khan ‘Ruhte’ tih nan a hmang a, chuvang chuan Ropuiliani kha ruhro-a rawn hawnchhoh angin a ngai ta mai niin a lang. Mahse Dictionary tam berahhian Bones hi plural-a hmang lovin singular noun-ah a hmang deuh zel. New World Dictionary of the American language,The New Oxford Illustrated Dictionary, Fank & Wagnallis New Encyclopedia te, Chamber Dictionary te chuan ‘Bones’ tih hi ruhrel chauh sawi nana hmang lovin taksa damlai leh thi, leh tawih mek sawi nan a hmang a. JF Dictionary chuan “Ruang’ tiin a dah.Tin, Shakespear-a thuziakah khian ‘fetch” a hman khi mi pakhat ruhro tlahrang nuai emaw, a khawma awm emaw la tur an nih chuan ‘collect’ a hman a rinawm.

Fetch a hman avang khian a thil laktir tur chu thil hlawm khat, thendarh ni lo a nih hmel viau a ni.

2. Tin, Lunglei Bawrhsap hian Lawngleng pahnihah tlangval 10 a tirh na chhan pawh hi ngaihtuah chian chuan ruhro mai ni lo Ruang’ ngei la tur an nih vang a ni. Mi pakhat ruhrola tur chuan hmun hla leh ei tur harsa karah mi 10 lai a tirh a rinawm loh.

3.Pi Lalsangzuali sailo(RIP) lehkhabu ‘ Tlawm ve lo, Lalnu Ropuiliani’ phek 174/f ah khan “Ropuiliani kuang chu Ralvawng mipuiin Selesih lui kamah an lo hmuak a, mipui en theih turin Lianpawnga leh Zahnuka’n kuang chu an kar hawng a’ tiin a ziak a. Kuang an kar hawn thu hi chu Ralvawng leh Denlung upa deuhho leh Vandula thlahte pawhin an sawi thei fur. Ruhro bawm mai a nih chuan “Kuang’ han tihtur chi em ni dawn? Tin, ruhro ngei pawh chulo nise, Ralvawng khawlaia phum tur a nih si chuan daia lo kar hawn kha a tul tehchiamin a lang lo. An khuaa phum loh tur ni ta chu, zui ve thei lo nunau hmuh atan an karhawng ni zawkin a lang. An karhawnna hmun Selesih luikam hi Ralvawng khawhnuai, Denlung panna kawng peng a ni. Lungleia Ropuiliani chungchanga symposium kan neih tuma Ralvawng aiawha thusawitu khan he ta kuang an karhawn tum hian an mrkhur tawk lova, Lalnu Ropuiliani hnar leh banrek an tihkhem palh thu a sawi a. Ruhro chu nisela hnar leh banrek a neih a rinawm loh.

4. Tin, Pi Lalsangzuali Sailo lehkhabu phek 200-ah khan kumpinu sorkar chuan tawihthuai theih lohna hloin Ropuiliani ruang chu chulhin, a ruhte an la chhuak a tiin a ziak a. Hei hi report engmah hmuhtur a awm lo. Khang hunlaia Sap sipai hotute India rama awmte kha a tam zawkchu kristian an ni a, kristian mitthi sawngbawl dan bosalin ruhte an chiahfilh a.

5. Note on the South Lushai Hills Administration report for 1894-95, para 14-ah chuan ti hian ziak a ni: “A party of 10 Lushais came down to Chittagong and carried back Ropuiliani’s corpse. This was the first voluntary visit ever paid by Lushai party to Chittagong.

“Ruang sawi nana ‘Bones’ tihah khan kan hmin tlang lo a nih pawhin chiangkuang takin “Corpse’ tia ziahna a lo awm tho a; heng atangte leh a chunga point hrang hrang atangte khian Lalnu Ropuiliani chu Chittagong atang khan Ruhro ni lovin Ruang ngeia Mizorama lak chhoh a ni tih a chiang hle.

Lalnu Ropuiliani hi Denlungah ngei an phum:

Lal Vandula hi kum 1889 khan Denlungah a thi a, khanglaia lal ruang sawngbawl danin a kuang ur ni ngei turah ngaih a nih bakah, an thlahte thu inhlan chhawnah pawh kuang ur ngei a ni. Vandula thih atang chuan kumpinu sipai officer tereport-a a landan pawhin Denlungah hian Ropuiliani chu lalah a thu zui nghal a, Shakespear leh a hoten an man thleng (1893) khan Denlung lal a ni. Hemi hun chhung hian Denlung lal in kawtah chuan Vandula Lungdawh chu a awm ta tlat atang pawh hian Vandula chu Denlungah ngei phum a ni tih a hriat theih awm e. Tunah chuan a nupui Ropuilian hi Denlungah ngei an phum a ni tih tilang tur point hrang hrang I lo thlirho teh ang:

1. Sairuma S/o Lalthuama (Ropuiliani fa naupang ber) kha Lunglei Bawrhsapin 1924 khan Vandula thlahte leh an lalna chanchin a zawt a. Chuta a thusawi pakhat chu:‘’Ka pi Ropuiliani chu Chittagong-ah a thi a, a ruang chu sorkar-in an rawn thawn a, Vandula thlanah Denlungah an phum,” (He thuziak photo copy hi Pu Lalvuana Sailo lehkhabu ” Mizoram humhalhtu Lal Vandula leh Ropuiliani’ tih phek 246-247 ah khan hmuh theihin a awm)

2. Tom Herbert Lewin (Thangliana) Diary, 1896 a mi chu Mandalay chanchinbu pakhat Zosuankhang an tih chuan a tarlan danin, Mizo Lalnu Ropuiliani kuangah chuan Jail a a hman thin No leh a tan chanchin ziahna lehkhabu dah a ni. Hetiang tak hi Denlunga kan ruangruh hai chhuahah khan hmuh a ni.

3. Saihnuna (S/o Dotawna S/o Vandula) Rotlanga a lal lai hian a fanu Lalziki kum 1 mi chu thih ngamin a na a. Saihnuna hian a pi leh pu (Vandula te nupa) bula dah ngei a duh si a, a thi thuai dawna an hriat avangin kum 1920 khan Denlungah Lalziki chu paw phein, an kai ta chuk chuk tih Saihnuna fate la damte zawhfiah theih an la awm hlawm a.

Hei hian Ropuiliani chu Denlungah ngei dah a nihzia a tichiang hle.

4. Hrangphunga (S/o Vandula) tupa Maj. Saibuanga’n (s/o Thanzama, Thiltlang lal) an thlahtute chanchin a ziahah khan, Lal Vandula chu a kuangur ruhte Denlungah an phum a, a luruh erawh chu an phum tel ve loh thu a sawi a, a luruh leh Lalropuii leh a fate thenkhat luruh chu a khawmin Thiltlangah an phum thu a ziak a ni.

## Ralvawnga an ruhro hai chhuahah khan puitling pahnih ruh chikim, luruh pahnih telin hai chhuah a ni a, Vandula te nupa chu ni sela luruh pakhat chauh hmuh a rinawm.

5. Pu Thangthiauva (90) Pangzawl, a pa Taitea, Khawngbawk lal Sangtuala (s/oVanhnuaichhana)Khawchhiar thusawi a chinchiah danin, lal Sangtuala hova upa zawng zawngte Ropuiliani vuina Denlungah an tel vek thu leh, ruhro ni lova ruang ngeia an phum thu a sawi. Hemi tum hian Denlung khua chu a hnim viau thu a sawi tel.

6. Pi Zachhungi, Hnahthial Bazar D/o Zabova (Vandula khawnbawl upa leh pasaltha) kawmnaah khan a pain Ropuiliani chu Denlungah ngei phum a nih dan a hrilh thin thu a sawi. (Kawmna video lo en pawh in awm ang)

7. Ralvawng lam thusawitu te’n, “Ropuiliani ruangruh ni tur chuan Denlunga an haichuah kha 1895 ami daih tawh si kha a la lang tha lutukin, ruh ral pawh a la awm lova, a ni thei lo’ tin an sawi thin a. hemi chungchangah hian ruang, a pangngaia phum chu nise hmuh tur vak a awm tawh lo ngei ang. Amaherawhchu he Denlunga kan ruangruh haichhuah hi a chhip atanga a keler thlengin eng hlo emawa zut vek a tih a hriat a, thlan khur hai hawn atanga rei lo teah a a ruh inzawmkhawm pawh a tla darh ta vek a ni. Art & Culture atanga rawn endiktute khan he hlo hi engemaw zat an la a ni.

Denlungah ngei an phum a ni tih tilang chiang tur hian sawi tur a la tam hle a, mahse ngun taka ngaihtuahna hmang duh tan chuan, a chunga kan tarlan atang ringawt pawh khian a chiang tawk hle.

A tul dan azirin Thanhulha te nupa, Ralvawng lal, leh Ralvawng ngeia thi tate thlan bo tak daih dante kan la ziak leh ang. Thudang alai chuan, FB lama ziaktuin ‘Ropuiliani hi Chittagong atang khan ruhro ngein an rawn hawn tih hi Jail report-ah a chiang” tia a rawn ziah kha, he Jail report hi produce tur a awm em tih ka zawt duh a, he report hi thlan hai kum leh symposium lai pawh khan sawi rik a awm ngai lo.

ȚÊK CHHUAI

Mit leh mit a intawng țêk chhuai,
En vung vung a rem lo,
Ka melh sawn daih!
Min lo la en em le?
Ka melh leh zeuh,
A țêk leh chhuai!
Pawh ngam si lovin
En vung vung rem lo kha,
Ka en ta tlawk tlawk!

Ka sawm huaisenna
Ka lama țanga
A hnen min thlen turin.
Huaisenna derdép
Khawi mah thleng zo lo
A lam hawia kiai-sukin
En vung vung rem lo kha,
Ka en ning thei lo!

Ralkhat ațang chauhin
Ka chhai ngam ve a
A mit meng mawi kha
Ka en țha ngam lo a
Mit khap kar lekah
Kian zai a rel ta
En vung vung rem lo kha,
Ka en zui vawng vawng

28/7/2017

THURUK THUHRUK

THURÛK THUHRÛK

Tuma chhiar phal loh thurûk,
Chatuan let thum atana thuhrûk,
Tu emaw hnen ațanga ka rûk.

Hringnun hlimthla lanna thurûk,
Mi zawng zawng laka thuhrûk,
Rûkru min chantu thurûk.

Lengi thinlai natna thurûk,
Ziak fung chawia a thuhrûk,
Hringnun tibuai tura ka rûk.

Leng zawngte hriatah thurûk,
Mi lung dam nana an thuhrûk,
Hril ka nuam e an thurûk.

july ni 21, 2015

A HUAISEN TAWK

Hriatchian tuma ka zawh lamtluang hi
Hriatthiam a har ka ti mang e
Hlim leh lawm ni lo thleng mah se
Lungngaihnain min chim leh țhin

Kal ngaihna hriat loh chang a awm fo
Sakruang lai tha a bo zo va
Pen khat pen pawh a harsa a
Suangtuahna a chuai zo ta

Mahse ka zawh zel dawn chu kawng chu
Harsatna lo thleng mah se
Tiam thu sut ngai lo he thinlung hian
Hnutiang a chhawn ngai dawn si lo
Hmatiang sawn turin ka huaisen tawk

A chang chuan nun hi a harsa a
Phatsan mai a chakawm leh țhin
Damchhan ber ka hmu thiam si lo
Lung lam vaiin ka kun leh ṭhin

Siamtu'n min pek hringnun hlu tak hi
Huai takin ka chen zel ang a
Ka damchhan chu ka hmu ve ngei ang
Lei piah lam ram nuamah tal sawn

15.7.2017

CHAWLH ZAI I REL TAK MAI LE

CHAWLH ZAI I REL TAK MAI LE

Kha chen sul ang inzuiin,
Lamtluang kan chhui dun țhin a;
Hlim ni leh lungngaih ni pawhin,
Chawlh zai reng kan rel ngai lo.

Mahse tunah eng vang nge
Lunglai min hersan tak le?
Cho loh leng i tawn vang maw,
Chawlh zai i rel tak mai le?

Sak ruang lei daia zal hnu
Pi leh pute kam chhuak chuan:
'Lal ngai lo làl a nâ, an lal a khà',
An tih zawng kan iang zo ta!

14.7.2017

(in memory of mamit sumo)

HLAN LEH CHE KA NUAM

Hlim ni chhiarin tlai ni kan leng,
Nunhlui thlirin thinlai a hnim;
Sulhnu chhuiin rilru ka seng,
Ngaiin ka au, a fan chhungril.

Duhthu ai ang sam chauh mai maw
Kei ka chan tawk lo ni dawn le?
Intawn ni a her chang hian maw,
Biahthu hlan leh che ka nuam e.

Hrui ang sei se kan hlim ni te,
Nau ang nuia hlim zai vawrin;
Mual liam tawh hnu nunhlui zawng te,
Sira hnawla ngaihlai bangin.

Khiangawi zamual i liam hnu khan,
Tlei ni hmel reng ka tawng si lo;
Suihlung hera lo let leh a'n
Sawm leh che ka zuam bawk si lo

12.7.2017

NUIMAWI

NUIMAWI

A sakhmel ka ka tawng,
Ka thinlai a țhawng.

Hriat ngai loh lanu,
Van angel fanu.

Thinlaian a cham,
A sakhmela dâr zâm.

Rûn hmun lendun ka nuam,
A tân engkim ka huam.

Dâr ang tawn ni her se,
Tawnmang mai chang lo se.

july 12, 2015

HOSTEL BIAHTHU

HOSTEL BIAHTHU

MZU hostel a ka lût,
Ka kut tin pawh a lût!
Riltam vanga chokáa ka purun rûk
Ka siam laiin ka chil a pût;
Room chhung phiatin bawlhlawh ka rût,
Ka thawmhnaw pawh ka sûk.
Zirlai aiin rilruah thildang a lût;
Ka thutiam sa pawh ka sût.
Exam dawnah dawt thu leng a pût;
Thla tawpah mi pawisa kan pûk!

july ni 9, 2014

MALYEE

May you live shine and bright
And you have to love me right
Loneliness will only be a thing
You gotta promise me something
Endless love untill we die
Eternal rest to be by your side

UNTITLED

A zuam zawng ka zuam lo va,
Hreh erawh ka hreh bik lo.

Phur taka hmachawn ka tum lo va,
Tlan chhiatsan erawh ka tum bik lo.

Nasa taka inbuatsaih ka tum lo va,
Thiam loh erawh ka tum bik lo.

Thiam thu sawi ka tum lo va,
Hnungchhawn erawh ka tum bik lo.

A hmasa ber nih ka tum lo va,
Thleng zo ve lo nih erawh ka tum bik lo.

HMANGAIHNA

HMANGAIHNA

Vawi tam biahthu ka hlan a,
Chhân zai reng min rel si lo.
Hmangaihna awmzia ka hrilh a,
Chu pawh a hrethiam duh si lo.
Thil hlu leh mawi tinrenga thuam a ni a,
Amah a inhmu thiam si lo.
A suangtuahna țha lo chu ka en kân a,
Min hawi zai reng a rel phah lo.
Dâwn lungrûkah a cham reng a,
Hmangaih biahthu ka hlan báng lo.
Min hawi mah suh se ka thlir reng ang a,
Biahthu hlan ka bang dawn lo.

july ni 5, 2015

Aizawl veng hming vuah chhan

Aizawl Veng Hming Vuah Chhan:

🌎🌎🌹🌎🌎

Bawngkawn: He laiah hian kum 1917 lai khan sebawng nei Gurkha in hnih lek an awm a. An awmna kâwn chu sebawngpu awmna kâwn tih a ni a. Tûnah chuan Bawngkawn kan lo ti ta zâwk a ni.

Bungkawn: Khatla leh Maubawk inkâra awm a ni a. A kâwn lai taka bung awm chu hmingah chawiin Bungkawn hming an vuah a ni. Tûn hma chuan sipai ho nupui an awm țhin.

Bethlehem: He veng hi a tirin Veng hming mumal tak nei lo a ni a, Transport Veng, Thatvunga Veng, Pioner ho awmna a nih vang in Midum veng te pawh an ti thin a, Veng pa ho kal khawm in Veng hming mumal neih an duh tak avang in, veng chhung ah hriattirna an chhuah a, Krismass leng khawm na ah Pu Rozikpuia'n Pathian hnen atang ka dawn a nia, tun atang chuan BETHLEHEM VENG kan ni tawh e, a tia. Veng pa ho kal khawm chuan lungrual tak in an pawm ta a ni.

Chanmari: Tûn hma chuan sipaiho chân kahna (silai kahna) hmunpuia an hman a nih avângin, an sawn hnu pawhin, vai hming vuah Chanmari hming hi an la pu ta zêl a ni.

Chaltlang: Tûn hmaa he lai hmuna Châl (mau) a tam avângin a hming hi vuah a ni.

Chawnpui: He vêng hi Hmuia Veng tih a ni thîn a. A awm thar hovin mimal hming an duh ta lo va, Chawnpui kung khat chauh awm chu hmingah chawiin Chawnpui an vuah ta mai a ni. Tûnah chuan Chawnpui-ah hian Chawnpui hmuh tur a awm tawh lo.

Chhinga Veng: Bazar pheiah vai tlémtë chauh an awm laiin he lai ngawpui kâr ni thînah hian Chhinga leh mi tlémtë chauh an awm a. An zînga vengva ber hming chawiin Chhinga Veng hming a pu ta a ni. A hming pum chu Chhingrawnga a ni a, Hnamte a ni. Mizo zînga tawng rang bera sawi a ni a. Ui ngul lêr atangin a tla a, thaw vawih, thaw vawih, thaw vawih a ti hman a ni an ti thîn.

Chite Lui: Aizawl khawpui bul chhak lama lui luang a ni. Kulikawn thlang atanga lo luang luite pakhat chuan Mualpui tláng thut takah a fin a. A finna lai tui chu a al a, bullut (sava chi khat)-in an tlàn thîn a, bullut sih an vuah nghe nghe a ni. Chu tui al chu a nêp e, tiin a zuk fin lui chuan Chite lui hming a put phah mai a ni.

Durtlang: Tûn hma chuan ngawpuiin a khuh vek a, ruah a sûr duhin khua a dur reng thîn a. Khua a dur reng e tiin Durtlang hming a pu ta a ni. Chu’ng hun lai chuan he tláng hi ramhuai leh phung tamna ber niin an sawi thîn.

Dinthar: A hming hmasa chu Keltawlh Veng a ni. Chu hming chu duh lovin vêng zau zâwk an siam tâk vângin, kan din thar e tiin Dinthar Veng an vuah ta zâwk a ni.

Electric Veng: Tûn hma chuan he laiah hian Tuitu a hrâm thîn avângin Tuitu Veng vuah a ni. Electric khâwlpui bunna hmun a nih tâk avângin a hming chawiin Electric Veng an ti ta a ni.

Kulikawn: Tûn hma chuan sipai te, sap te leh midang te puakphur tur apiang chu he laiah hian an innghâkkhâwm thîn a. Kuli ho innghahkhâwmna kâwn tiin a hmingah Kulikawn an vuah ta a ni.

Khatla: Gurkha tawng a ni a, kâwn emaw, ruam emaw an tihna mai a ni. Sipai kâwnghrèn nawhtlêtna hrui thûr he lai hmuna mi an lâk thin chu ‘khawia mi nge?’ tia an zawhin ‘khat tla’ khu mi kâwna mi khu,’ an ti thîn a, keini’n Khatla kan lo ti ta a ni.

Laipuitlang: Kumpinu sawrkarin Mizoram khawpuia Aizawl a hman tan lai khan mite’n Pathianni an hriat theih nan tiin Col. Lock Manding sapin Pathianni apiangin he tlángah hian laipui a han kâp thîn a. Kristian an lo awm hnu chuan a lo remchâng hle a. Kanghmun khua leh Sateek khua te pawhin an lo hre phâk a. Mizovin laipui an kahna tláng tiin Laipuitlang an lo vuah ta a ni.

Luangmual: Hmán laiin a mual hi luang hmunpui a ni a; a mual pumpuia luang awm chu Luangmual tiin hmingah a put phah a ni.

Maubawk: Aizawl tlâk lamah khuan tûn hma chuan mi tlémtëin bâwk an khawh a; an bâwk chu a chungah mau hnah an chih theuh va, chu vângin chu bâwk chu Maubawk hming an vuah.

Mission Veng: Tûn hma chuan Hriang thing a tam avângin Hriangmual an ti thîn. Zosap hmasa Saphluia kha a lo awm a, Sapthara’n a rawn fin leh a. Missionary awmna hmun a nih tâk avângin Mission Veng vuah a ni ta a. Veng lai, Dawrkai Veng leh Laltawnga Veng tiin hmun thumah an then a. Tûnah chuan a lo zau ta a. Laltawnga Veng tih chu Vengthlang (Mission Vengthlang) tih a lo ni ta zâwk a ni.

Macdonald Hill: Tûn hma chuan Thingpui huan tlang tih a ni thîn. He lai hmunah hian Aizawl leh a chhehvêla thingpui awmte chu an phun khâwm a, sipaiin an awmchilh a, an rin pui ber pakhat a ni. Kum 1930 khan Mizo chowkider pawh he huan enkawltu-ah an dah nghe nghe. Kumpinu sawrkar hnuaia bawrhsap hnuhnung ber Macdonald-a’n High School hmun atan he lai hi a pêk avângin a petu hming chawiin Macdonald Hill an vuah ta a ni. Tin, he lai hmun hi missionary hmasa berte Pu Buanga leh Sap Upa te lo awmna a ni.

Ramhlun: He vêng hi a hming phuahtuin hlaa ‘Aw ramhlun, ka ram ropui..’ tih atanga a phuah niin a lang.

Republic Veng: Lunglei Jeep road laih zawh hnua a chunga lamlian kal hi bawrhsap Barkataki hova laih tlang niin a kawng hmingah Republic Avenue vuah a ni a. Republic tih chu a vêngin hmingah a pu ta a ni.

Rangvamual: Aizawl chhehvêla rangva in awm hmasak berna a nih avângin a mual chuan Rangvamual hming a pu ta a ni. Vai chuan Paila Camp an ti thîn. Kum 1890-a Aizawl-ah fort (kulh) an siam hmain he Paila Camp hi awm tawhin an hria.

Saron Veng: He hming hi rambuai hnua an vuah thar a ni. Police Veng (tûn hnua Armed Veng kan tih hi a nih hmêl) leh Mirawng veng an kaikawp a, Saron Veng an vuah ta a ni. Hla thu-a ‘Isua sarawn pâr mawi vul lai a chul lo’ tiha sarawn hi an vuah chhan niin an sawi.

Tanhril: Tûn hmaa Palian lal nunräwng tak Tanhrila khua a nih avângin a hming chawiin ‘Tanhril’ an vuah hlen ta a ni.

Tlangnuam: A hming hmasa chu Lalchhinga (Lal Singh Thapa) Veng a ni. Hetah hian nula pakhat tlangval lêm thiam tak a awm a, a tláng a nuam fawm bawk a; tlangvalin nuam an ti a, a tláng chuan Tlangnuam hming a put phah ta hial a ni an ti.

Thakthing Veng: Aizawl-a vêng upa ber pâwl a ni. Rahsi leh Babuho, DC pisa chhuah lam, Venghlui ti-a an vuah tâk (Rahsi Veng) atanga an insuanin Thakthing tlángah hian an awm a; an awmna vêng chu Rahsi Veng tih a ni ta zâwk a. Thakthing Venga awm hmasa, kamding ni lo chu a hnuaiah an hnawt thla a, Rahsi Venghnuai an vuah a. Mahse, hun a lo rei a, rahsi thuneihna a lo dal ta deuh va, Thakthing Veng tih chu a lo lâr leh ta zâwk a ni.

Tuikual: A vêng thut lui chu Tuikual lui a nih avângin hmingah a pu mai a ni. Indopui pahnihna hma chuan ngawpui a la ni.

Venghlui: He hmun hi Rahsi lo awmna hmasa ber a ni. Mahse, Rahsi ho chu Thakthing lamah an sawn phei tâk avângin Rahsi Venghlui tiin an sawi ta a. Tûnah chuan Rahsi bànin Venghlui kan ti ta a ni.

Venghnuai: Thakthing Veng hnuaiah a awm. Rahsi ho Thakthing Venga an awm laiin, kamding lo an hnawhthlâk ho awmna a nih vângin Rahsi Venghnuai an vuah a. Tûnah chuan Venghnuai ti-a sawi a ni ta a ni.

Zemabawk: A hming hmasa chu Seling a ni. Se pûl phûm a tam avângin Seling hi vuah a ni. Darlawng tláng Seling-ah an pêm zawh hnuin Zema hovin melveng in tlémtë an awm a, bâwk tiin an invuah a. An hotu chu Zema a nih avângin Zema bâwk tiin an sawi kher thîn a, Zemabawk tih hming hi a lo pu hlen ta a ni. Zema hi palian tak, thau tak a ni. Zanlawn-ah a pêmthla a, kum 1940 vêl pawh khan a la dam.

Zarkawt: He lai kâwn hi Vaki liam kâwn a nih avângin Ki len an zâr thîn a, Zarkawn an ti thîn. Tûnah chuan ‘Zarkawt’ tih a lo ni ta a ni.

Thulâkna: Tobul by K. Zawla.
C.p.

PHUNCHIAR VERSE

PHUNCHIAR VERSE

Aw lanu dàwn tawi,
I lungduh lenrual fâm ta kha,
Rual pawl nan ngai der suh la;
Thai kawi thu tin hril velin,
Mi khawngaih thla lak tum hek suh.

A tak ramah chen tum zawk la,
Suangtuahna ram chhuahsan thuai rawh;
Awm lo ngaia țah a sawt lo.
I chantawk khuarel a nih pawm la,
Hmatiang sâwn zai rel zawk nang che.

july ni 2, 2015

FUR SONNET

FUR SONNET

Hawi vel ila vangkhaw tlai tlanah,
A mawi ngei e chung thangvan khua;
Chung khawpui ri leh malsawm ruah,
A zawhin tlai dai nuam leh fur khaw thiang.

Malsawmtu malsawmna zar zovin,
Bum hmang hringmi lunglawm ve nan;
En nawm man tam sum seng lovin,
A chhuah chunga khuanu'n kan tan.

Kan hlan khuanu i tan lawmthu,
Hringmi dam leh nawmsakna tur
Kan dil a che mal tinreng sawmtu
A tawp chatuana chawlhna tur.

Lei lung leh boruak thiang nuam tinreng
I zarah kan dawng malsawm tin nen.

25.6.2017 6:40 PM

Thlafam vangkhua

Intro:
Siamtu'n a duan hringnun lamtluang
Muangte'n a chen, a hlan a sakruang;
A duhsam dawn tuai, dam chhung atan
A tiam, a hlan a thinlung A-tan.

Hlim lai par tlana len beisei khan,
Hriat loh lamtluang a zawh tak si kha;
Tu bengkhawn loh a chan riangvai,
Sârin a man a pan pialral,
Hringnun vul lai bel rei lovin;
A lawi ta e thlafam vangkhua.

1st verse:
Senlai nau ang kan lawm, hlim ni a sei,
Kan enchimloh banah kan kai;
Chutin chhimhlei tual mawiin a leng,
Kan nau duat, laitual mawitu kha.

2nd verse:
Kan duat tleitirin lungdum val tawngin,
Belh zai a rel kumtluang atan;
Hlim ten a hringnun hmang ve turin,
Țhaleng runah a lawi ta e.

3rd verse:
Khuanu zarah a dawng malsawm fanau,
Kan lawmpui e a laichinten;
A tan hlim lawm ni lo sei zel se,
Dawng rawh se duat, hmangaih tinreng.

4th verse:
Duhthu ai ang kan sam thlawn ka ring lo,
Khuanu remruat reng em ni le?
Eng ti zia nge awmlai hrang si lo
Thihna kut vawtin a man tak?

5th verse:
Ngilneihna leh duhawmna hual ka nau,
Thlafam vangkhua i lawi ta maw?
Derthiam leng i tawng zawk em ni le?
Sâr zama vangkhua a rum tak.

6th verse:
Thawk leh khata'n i liam mai ta si maw?
Tuar thiam a har, thinlai a nâ;
Lo kir leh hian i mawi tawh si lo,
I hlimthla chauh maw kan chan tawk?

I VA'N SUAL THIAM TAK!

I kianga leng turin
Ka zawng reng țhin che a

I rin ngam ni turin
Ka theihtawp ka chhuah a

I mitmei veng reng rengin
Ka fimkhur reng țhin a

I rilru hriat tumin
Ka ngaihtuah reng che a

Ka kiang leng turin
Min zawng ve ngai si lo

Ka rin ngam ni turin
I theihna i hlan hek lo

Ka mitmei veng reng rengin
I fiamkhur ngai bawk si lo

Ka rilru tak tak hre turin
Min ngaihtuah ngai si lo

I va'n sual thiam tak!

PIPUTE SERH LEH SANG - a compile tu ka hre mai lo

PI-PU-TE SERH LEH SANG

1. Thang awk ru suh, sakuh awk ruk phei chu sakei sehna.

2. Tlubing te, keptuam te leh rul ke te hi hmuh thiang lo a ni.

3. Sakei ek zuk leh van ekkhum chu chawplehchilhin a pawi.

4. Thenawm emaw, mangang thawm reng reng hria chhan ngam lo chuan pawnfen feng nghal rawh se!

5. Nunau tithlaphang zawnga tualchhunga che mi chu a chi thlah tam hmain thah nghal tlak a ni.

6. Thil hmingthang tidanglamtuten thlahlei an vei ngai lo.

7. Hreipui, tuthlawh leh puan ruk chu mahni thlan laih nan leh ruang tuam nan hman a tul duh hle.

8. Luipui tlak dawna pa kuk ruih ruih leh, hmeichhe hriat atana pa aw thian kuk kuk chu pa rawn tlak an tling ngai lo.

9. Khawtlang awm ni serh loh hi vanni salna a ni duh.

10. Lasi thang hi sah chhiat zel tur a ni, awh palh a hlauhawm.

11. Pumah hmeichhia lal tur, tuikhurah mipa; mipain lo vat se, hmeichhiain thlai chi thlak rawh se.

12. Sa beihnaa thiante chhan ngam lo chuan pawnfen feng rawh se.

13. Phir pianghlim ennaah, a va rapthlak em tih zawk tur a ni.

14. Ram mi tawk apiangin maucheh siam zel tur.

15. Samawngping kawmthlangte pek tur, kawmthlang nei lo chuan kawmchhakte pek tur.

16. Pal sawn chin hi mi duham, mi thawveng rei lo tur hna a ni; kawngpui pin phui lek phei chu a thiang lo.

17. Nupui fanau riltama thih tep tawh a, chhek in buh ru ngam lo chu pa tling lo an ni.

18.Sawntlungah hma an phel ngai lo; sakeiin a seh duh.

19. Thing zung tuah suh, hnute a pan duh.

20. Mahni lo hlui chiah theh khatnaah an nei ngai lo, "Ka ar bo a lo hawng leh ta," a ti a, min talh mai.

21. Ramvahnaah naupang an hnuhnung ngai lo, laikingin chil a chhak duh.

22. Saiin a tluangah thing a kham chuan chhui tawh loh tur.

23. Sakei aih niin la lamin deh loh tur.

24. Nu leh nu insual pain thelh loh tur.

25. Vapual, kawlhawk leh vahai bu lak chuan thinghar hnutchhiah tur.

26. Khaw chhunga muvanlai nupa inthen, chhim leh hmar pan kher hi, nupa tang thenna emaw, lenglai thihna emaw a thleng duh.

27. Kawng kham zawnga Thingkhawsa tlu hi lenglai thihna.

28. Sakeiin sa awk a lak chuan chhuh loh tur.

29. Mi zawnna hlang chema phelh loh tur.

30. Vapual, kawlhawk, vahai pa no chawm la, nupa tang thenna.

31. Innei turte inah ruang chhuak sela, inthulh tur, hun dangah thar thawh leh tur.

32. Balhla vuiin a neitute khumpui a kawh chuan ruang a chhuak thin.

33. Phunchawng phun chu khuangrual a nihin a phuntu a thi mai thin.

34. Sakei, a hnu a rul chuk chuan kir san tur, vanduai a hauhawm.

35. Naupai laiin a pain hengte hi a thawk tur a ni lo :- Ranpui talh, rul thah, hlang zawn, vawk kuang suih, thlengpui leh thutthleng tuk; nau piangin , "Kutchuk" a nei duh.

36. Naupaiin luipui a kan chuan luipui huaiin nau kha a lo hmu a, a tla mai thin.

37. Mi in aia pawng bikin in sa suh, "Mi anchhia zawng zawng dawn ka huam e," tihna a ni a, a thu neitu ber an thi duh.

38. Kawn hnawhin in sa suh, Ramhuai liamna a ni; sak rawttu emaw, a satu emaw an thi duh.

39. Kawt lama in sak zawm sei chu thihna a ni.

40. In sak thatin chenna lai sak hnan lovin thiat rawh; van ni an sal duh.
41. Vantlang kawng hnawh emaw, tihdanglam emaw a thiang lo' ruang a chhuak duh.

81. Mihring leh ranpui nghaisatu chuan thlahlei a vei ngai lo; thlahte thlengin an riral duh.

42. Thlan laihna hmanraw thir tuai thar leh loh an chhungkua ten hman mai loh tur. Thlan laitute pawhin a neituten tui an lum sak a, buhfai tlem an thlakah kut an sil kher tur a ni.

43. Nula leh tlangval, khaw danga tlan dun turin, an kal lohna tur lam kawtchhuahah chhawl an zut thla hmasa tur a ni; chumi hnuah an kalna lam turah an kal vang vang tur a ni, an chhawl zut thlak kha sakeiin a chhiar ang a, a chhiar zawh hmain an kalna tur khua chu an thleng hman ang a, an him tawh ang; sunhlu hnah an zut kher thin. (Hemi an chinna chhan chu, hman laiin Nula leh Tlangval tlan dun sakeiin a lo seh vang a ni.)

44. Kawmchar lam sumhmuna hman leh a thiang lo, ruang a chhuak duh, "Tlunglet" an vuah.

COLLEGE GIRL

Kawrfual dum
Tle sep sep kha,
I mit meng mawi tak nen
I inhmeh bikzia kha.

Prom night-ah kan lam dun kha
Prom queen i ni ta daih a,
Prom king ka ni ve si lo!
In lâm ka en tâk ngawt kha.

Message kan inthawn țhin kha,
Nang hmun dangah i awm daih a,
Kan inhmu thei ngai si lo!
Ka ngaih țhinzia che kha.

Kum tam a her liam tawh a,
Khang hun hlu zawng te kha
Ka nghilh tawh emaw ka ti a,
Zaninah kan inhmuh leh si kha!

KÂR KHAT

Zirtawpniah ka hmu che
ka mitin
Inrinniah ka hmu che
thinlungin
Pathianniah ka dil che
țawngțaiin
Thawhțanniah ka bia che
beisei neiin
Thawhlehniah ka dil ang che
i number
Nilainiah ka hruai ang che
canteen-ah
Ninganiah ka hmuh ang che
ka mitmei
Zirtawpniah ka hlan ang che
ka dawn lungruk.

ZING

From that day called hackensack
Rode you home like my back pack
In the middle of the night
Engine's heat reached my heart
Never felt that way before
Drowned by the fresh warm breath
Zing - represents you
Oar of love beats me all night
Nostalgia is your new name
Endless dream and memory remains...

LAST BENCHER

Ka thu thawn bawm
ka hawng a
Nambar hriat
ngai hauh lovin
'I dam maw?'
Min lo ti.
Ka dam thuin ka chhang a
A thlalak pho chhuah
ka thlir zui
Naupang pahnih
karah nula
Kum tam liam taa
ka hriat hnu
High sikula tlar
hnung bera mi kha
Biang sum nei
ngei mai kha
Ka thinlai ril luah țhintu
Ngei mai kha a lo ni.
Beisei nei takin ka zawt a
Hawihhawm takin a sawi
A ding leh veia mite chu
Ka fate an ni, tiin

SAR ZAM

SÂR ZÂM

Eng zûnah mah uai tawh lo turin ka intiam a, mahse ka tawn ni che khan chu thutiam chu bawh chhiatin a awm ta.

Inhung bikna dân ka insiam pawh zawm hlei thei loin min siam a, nang vangin ka dahkham ka nun.

I hmel mawi tak chhun êng tur leh i duhawmna belhchhah tura i chunga ngilhneihna sâr zâm ka hmu a, Angel ang mai i lo ni.

Ka tlûk nawn tawh loh nân i êng chuan min chhun thlu a, i zûnzâm chuan ka țuanna apiangah min hual vel țhin.

Ka duh mai ni lo ka mamawh i ni a, ka tan chuan khawngaih chhandamtu i ni zet mai.

=====================================

I swore I'd never fall again
But this don't even feel like falling
Gravity can't forget to pull me back to the ground again

And it's like I've been awakened
Every rule I had you breakin'
It's the risk that I'm taking
I'm never gonna shut you out!

Everywhere I'm looking now
I'm surrounded by your embrace
Baby, I can see your halo
You know you're my saving grace
You're everything I need and more
It's written all over your face
Baby, I can feel your halo
Pray it won't fade away

Ka kiantir ngai lo vang che

Ka kiantir ngai lo vang che
-fela ngente

I hma lam hun chu thimin bawmin,
I zawh lamtluang chu chhui harsa ti mah la
Nangmah mai chuan i bo ngai lo vang,
A chhan chu malin i awm tlat si lo va.

I mittui khan ka thinlung a hliam țhin a,
Hringnuna hmun thim lai ber dai chang ni a awm fo,
Harsatna do turin kan chak tawk lo pawh a ni thei e,
mahse....

I kiangah ka ding zel ang a,
kawng harsa paltlang turin ka theihna zawng zawng
I tan ka hlan ang.
I chauh châng niin
I mittui hru faitu ka ni ang a,
I hmachawn apiang kan bei dun zel ang.
Nghet takin ka pawm che ang a,
Ka kiantir ngai lo vang che.

====================================

You think you're lost
But you're not lost on your own
you're not alone.....

It hurts my heart, To see you cry
I know it's dark, This part of life
Oh it finds us all And we're too small
To stop the rain, Oh but when it rains

I will stand by you, I will help you through
When you've done all you can do
If you can't cope, I will dry your eyes
I will fight your fight, I will hold you tight
And I won't let go

ROMANTIC MONTH PUALIN

"Before The Next Teardrop Falls"

I hlimna tur a nih dawn phawt chuan a kiangah chuan awmin zui mah la, ka duhsakna sang ber ka hlan ang che. A chhan chu hlim taka i awm hi ka thil duh ber leh ka tawngtai fona a ni si a.

Mahse maw, a hnena tanga lunngaihna leh mittui chauh i dawn hunah hei hi hi hria la, 'I mittui a far nawn hmain i kiangah ka awm ang a, i tan ka ding zel ang.'

Hnemtu ngaia i rum hunah i tan ka lo la awm fan ang a, min mamawh hun apiangin i kiangah ka awm zel ang.

Hnawl leh phatsan i niha beidawng taka i hringnun zinkawng i zawh hunah meuh pawh hei hi hre nawn fo ang che, "Ka hmangaih che" tih hi.

=====================================

If he brings you happiness
Then i wish you all the best
It's your happiness that matters most of all
But if he ever breaks your heart
If the teardrops ever start
I'll be there before the next teardrop falls

I'll be there anytime
You need me by your side
To drive away every teardrop that you cried
And if he ever leaves you blue
Just remember, I love you
And I'll be there before the next teardrop falls

LENG DAWNTAWII

Vangkhawpui laitual mawitu,
Chun leh zua chinlai nghahfak,
Leng zawng entawn, vâl-tin duhsam;
Thai kawi thutin zir turin
A liam ta e mualhla kar dan.

Lenrual zingah a leng vel e,
Hlim ni hrui ang sei turin,
Ai ang a sam a tlin phak bak;
Khuanu zarah tluan beiseiin
Hmangaih lipui a dâi ta e.

Duhaisam reng a kim thei lo,
Hmangaih hlimlai a rei si lo,
Leng dawntawii'n a dâwn kim lo;
An vangkhawpui hnutiang chhawnin
Chhingkual val tawnah a thaw a nêm!

Siamtu duh loh hnar theih si loh,
A dawng ta e hmangaihna luangliam,
Rûn lum nuthaia'n an sawm si lo;
Thlunglu a hai lunglam a vai,
Thurûk thang tur a dâwn ngam lo.

Selna ânka dawn a zuam lo,
Lenrual zingah a hlim mawlh lo,
Thiam tawk têin a danna hlo,
Lungmawli'n a hmang ta e,
A chan tur reng a dâwn si lo.

Hlim ni a liam sakruang a chuai,
Thinlung a hliam, hnemtu tawng lo,
A chan râpthlak a tuar zo lo;
Thlafam vangkhua a lawi dawn e,
A thuruk nen chatuan siang a lawi ta e

13th Feb, 2016